Tormenta tropical Eta a subi tera na Florida

Oficialnan di estado a cera beachnan, puertonan y facilidadnan di Covid testing den preparacion pa e yegada di Eta diadomingo anochi.
Tormenta tropical Eta a subi tera na Lower Matecumbe Key na Florida diadomingo anochi, despues di a laga un monton di morto y mas di 100 persona desapareci na Mexico y Centro-America.
National Hurricane Center na Miami a duna advertencia di inundacion pa Florida Keys, cuminsando na Ocean Reef te na Dry Tortugas, incluyendo Florida Bay.
Oficialnan na Florida a stop transporte publico y a urgi residentenan pa no subi caya. Algun districto a cera scolnan dialuna. Varios shelter a habri na Miami y Florida Keys pa residentenan di casnan mobil y lugarnan cu mas riesgo pa inundacion.
Eta su biento maximo tawata na nivel di 65mph (100kph) diadomingo anochi, y su centro tawata 30 miya (45km) este-noreste di Marathon, Florida, y 70 miya (115km) este-noreste di Key West. E tawata moviendo west-northwest cu un velocidad di 14mph (22 kph).
E tormenta a inunda zonanan na Cuba, na unda 25.000 persona a wordo evacua, pero ningun morto a wordo raporta. Na Guatemala 60.000 hende a wordo evacua, e cantidad di morto a subi di 15 pa 27 y ainda 100 persona ta desapareci. Na Mexico por lo menos 20 morto a wordo raporta y esaki na Honduras tawata 21.
Na Florida, gobernador a declara estado di emergencia diasabra pa 8 counties, mientras Eta tawata aproximando, urgiendo residentenan pa zorg pa nan tin suficiente suministro den cas.
Miami-Dade county a declara estado di emergencia diabierna anochi y a anuncia un alerta di inundacion cu lo keda vigente te cu diamars anochi.
Eta inicialmente a subi tera na Nicaragua como horcan categoria 4.