Representante Hulandes di cartel di Cali deteni na Spaña

MARBELLA – Polis Spaño a detene un narcotraficante Hulandes cu tawata traha pa e cartel Colombiano di Cali. Segun autoridadnan Spaño, e Hulandes ta descendiente di Colombia y tawata representa e cartel notorio aki na Europa, principalmente na Hulanda y Reino Unido.
E homber a wordo aresta na e provincia di Málaga cu ayudo di polis Hulandes. E ta wordo sospecha di labamento di placa na gran escala, entre otro 6 miyon euro den forma di cryptovaluta. Su identidad no a wordo publica.
E investigacion policial na Spaña a cuminda na 2018 ora cu a cuminsa ripara actividad di un organisacion criminal internacional na e provincia di Málaga. E Hulandes a sinti presion di polis Hulandes y a huy pa Marbella. Ey, e tawata biba den un cas di luho. Tambe e tawata tin un cas na Delft.
Na momento cu el a wordo aresta, tres auto, holoshinan caro, un cantidad di 85.000 euro na biyete, creditcards, computers y telefonnan celular a wordo confisca. Tambe na Hulanda, polis a pone beslag ariba 170.000 dollar den forma di cryptovaluta.