Reporte Global di Coronavirus: Hefe di WHO Tedros den isolacion despues di contacto cu un caso positivo

Tedros Adhanom Ghebreyesus, director general di World Health Organization, ta den isolacion despues di contacto cu un hende cu Covid-19.
E hefe di World Health Organization a bai den cuarentena voluntario despues cu un persona cu kende e tawata tin contacto a test positivo pa Covid-19.
Mientras Covid-19 ta plamando rapidamente na Europa, Tedros Adhanom Ghebreyesus, kende ta basa na Geneva, a haci e anuncio aki ariba Twitter laat diasabra anochi, pero a enfatisa di no tin sintoma.
“Mi a wordo idenfica como un contacto di un hende cu a test positivo pa COVID19,” Tedros a bisa den su tweet.
“Mi ta bon y sin sintoma, pero lo bai den cuarentena voluntariamente durante e siguiente dianan, conforme na e protocolnan di WHO, y mi lo traha for di cas,” el a agrega.
Tedros tawata lidera WHO su esfuerzonan pa bringa e pandemia, cu a costa bida di 1.2 miyon hende y a infecta mas di 46 miyon hende rond di mundo desde cu el a origina na China na fin di aña pasa, segun e cifranan di Johns Hopkins University.
El a enfatisa ariba Twitter cu ta sumamente importante pa nos tur sigui aplica e guia di salud.
“Esaki ta con nos lo kibra e cadena di transmision di Covid, suprimi e virus y proteha e sistema di salud.”
Autoridadnan na Slovakia a bisa cu 2.58 miyon hende – casi mitar di e populacion di e pais – a test pa Covid-19 diasabra como parti di un esfuerzo di dos dia, pa stop e plamamento di e infeccion sin tin mester di bai den un lockdown.
Den un experimento, cu otro paisnan ta bezig ta wak di cerca, hendenan a wordo pidi pa haci e test aki voluntariamente, of risca cu gobierno lo impone un lockdown ariba esnan cu no participa, incluyendo un prohibicion pa bai traha.
E situacion ta empeorando na Europa; ta premira mas lockdowns y durante weekend tawata tin mas protesta contra restriccionnan ariba bida diario.
Na Spaña, prome minister Pedro Sánchez a haci yamada pa un fin na e comportacion “violento e irracional” di un minoria di hende despues di demostracionnan den e ciudadnan Madrid, Barcelona, Málaga, Vitoria, Valencia, Santander y Burgos, contra e decision di gobierno pa declara un situacion di emergencia pa 6 luna como respuesta ariba e pandemia di coronavirus.
Tambe na Italia tawata tin protestanan contiuo diadomingo pasa, cu demostrantenan na Naples subiendo caya y exigiendo pa “Duna nos bek nos trabou, duna nos back nos dignidad”, y yamando e gobierno pa “ladronnan di libertad”.
Diadomingo anochi mas di 300 hende a reuni den centro di São Paulo, Brazil pa protesta governador João Doria su sosten pa testnan imuniologico obligatorio y testing di e vacuna desaroya door di e compania Chines Sinovac. E minister di salud di e pais, Eduardo Pazuello, cu ta malo cu Covid-19, ta drumi den hospital desde diadomingo anochi despues di a wordo traslada for di un facilidad civil mas tempran durante dia.
Sostenedornan di Donald Trump na Estados Unidos tawata grita “Fire Fauci” durante un rally y e presidente a duna e indicacion cu e lo por haci esaki despues di eleccion.
E hostilidad contra Dr Anthony Fauci, e experto di gobierno Estado Unidense ariba casonan infeccioso a bin despues cu el a causa rabia cerca White House door di adverti cu durante invierno e virus lo continua.
Protestanan anti-lockdown tawata mas pacifico na Reino Unido pero e anuncio di diasabra pasa, cu Inglatera lo bai den un lockdown pa 4 siman cumindando diahuebs, a causa indignacion cerca miembronan di parlamento den Boris Johnson su partido conservativo cu ta na mando.
Ta di spera, cu e lo bisa e miembronan di parlamento den House of Commons awe cu “no tin otro alternativa” cu e lockdown, cu lo ocasiona cierre di bars, restaurants y tiendanan no-esencial te cu 2 di december. Minister di e gabinete, Michael Gove, a sugeri cu e lockdown aki lo por dura ainda mas largo, mientras cu e corant the Times a raporta dialuna, cu e medidanan lo por keda vigente te cu otro aña mientras cu casonan sigui subi cu mas di 25.000 pa dia.
Malcontento ta sigui wordo manifesta, door di e anuncio di Nigel Farage cu e ta bezig ta cambia e nomber y imagen di su ‘Brexit party’ pa un ‘anti-lockdown Reform UK party’.
Diadomingo anochi a wordo reporta, cu Prince William a test positivo pa e virus na april, pero e noticia aki no a wordo haci publico, pasobra e famia real no kier a “preocupa ningun hende”.
Fuente: The Guardian