Home History of Aruba Historia di Aruba: E conocido Pink Panther a wordo tira fatalmente pa...

Historia di Aruba: E conocido Pink Panther a wordo tira fatalmente pa un agente policial

SHARE

A peticion di un fiel bishitante di Arubanative.com.
Sr. C. Geerman, ata e historia cu bo persona a pidi nos.

E informacion aki, ta informacion cu a wordo documenta 
for di polis di e tempo ey. Si tin cualke famia of persona
cu sa mas di e sucedido aki, semper ta mas cu welcome pa
manda nos un email of por inbox nos riba nos Facebook page, 
pa asina nos por añadi mas na e historia aki. Hunto nos 
lo yuda conserva historia di Aruba pa nos futuro generacion.

E biaha aki nos lo dedica e historia di Aruba na un persona, cu den añanan 1978 pa 1980 tabata hopi conoci no solamente den e districto di Santa Cruz, pero tambe rond Aruba. E tempo ey manera scucha e nomber di Pink Panther tur hende ta pensa “here comes trouble”. Pink Panther su amigo tabata yama “Diablo preto”, Diablo preto tabata e ultimo persona cu tabata cu Pink Panther prome cu e la wordo tira. Ambos den final di 70 pa 80 tabata hoben y tur dos  tabata biba den e districto di Santa Cruz, e parti pariba.

Felix Luciano Werleman alias Pink Panther
Felix Luciano Werleman alias Pink Panther, a nace dia 28 di mei 1958 na Aruba y tabata biba na Santa Lucia. Felix por a wordo compara cu un Dare Devil. Felix tabata un hoben cu tabata sa di a duna polis y su famia basta dolor di cabes.
Segun nos a compronde Pink Panther no tabata tin trabou y tabata dedica su tempo entre otro na horta pa e por a mantene su mes. Pink Panther tabata tin un abilidad unico di horta y sigur e forma cu e tabata horta auto, placa, den casnan etc.  mesora polis tabata sa cu ta trabou di Pink Panther. Pink Panther tabata tin su bon brothernan den districto di Santa Cruz.

Pink Panther informante di polis
Hopi hende tabata bisa cu Pink Panther tabata un diabel, tabata haci malo so, esey sigur no tabata cuadra completamente cu e berdad. Pink Panther a yega di haci cosnan corecto tambe. Combersando cu un reportero di antes, e la divulga algo cu hopi hende no tabata sa ta, Pink Panther tabata tin amistad cu un recherche, kende e tabata confia. Hopi biaha e la fungi como un informante di Polis. Pink tabata dune informacion, e tabata te hasta busca informacionnan clave pa e recherche aki ora e rechereche pidi’e y a cambio e recherche tabata dune algo pa e por come y sobrevivi. Na momento cu e recherche a haya sa cu un di su coleganan a tira Pink Panther, e la keda desapunta y rabia pa motibo cu e la perde un di su informantenan clave.

Pink Panther a lanta cu su mama pa placa
Pink Panther constatemente tabata den noticia, pa e fechorianan cu e tabata comete. Riba un dia den final di Juli na 1980, Pink Panther a dicidi di bay bishita su mama, tur cos tabata masha bon, te ora cu e la pidi e mama placa y a mama a nenga di dun’e placa. E la bira razo, cuminsa haci desordo y kibra cos den cas, e la hisa stul y mesa benta, tambe e la kibra varios glas y mas cos den cas. Mesora a pidi pa asistencia di polis, pero ora polis a yega na e cas ya Pink Panther a sali bay y nan no a hay’e mas.

Pink Panther a horta na Natural Bridge y na Andicuri 
Diadomingo 10 di augustus 1980, un biaha mas Pink Panther tabata wordo busca pa autoridad, e biaha aki tabata pa robo. Den oranan di atardi polis a wordo poni na altura cu den area di Natural Bridge tin dos persona canando sosopechoso y posibelmente cu mal intencion.


Natural Bridge, unda nan a horta yabi di e Snack, yabi di auto y di cas.

Ora polis a yega na Natural Bridge ya e dos personanan sospechoso aki a bay caba. Polis a topa cu e doño di e Snack cu tin na Natural Bridge, e hombere tabata hopi rabia y e la conta e polisnan cu e dos personannan sospechoso aki a horta yabi di e snack, su yabi auto y di cas. E descripcion cu e la duna polis, mesora nan tabata sa cu ta trata di Pink Panther. Mientras polis tabata cabando na Natural Bridge, nan a wordo pidi pa bay Andicuri cu urgencia.


Andicuri Beach, caminda e homber Hulandes tabata ora nan a horta den su auto

Na yegada na Andicuri un homber hulandes a bisanan cu dos homber a drenta den su auto y a bay cu su yabi auto, yabi cas, un tas y 300 florin. E descripcion cu e homber Hulandes a duna di e dos personanan tabata cuadra cu esun di Natural Bridge. Mesora nan a bin compronde cu ambos caso di ladronicia a wordo cometi pa Pink Panther y su amigo. Pa mas cu un luna polis tabata buscando Pink Panther y su amigo pero sin resultado, te dia 15 di september 1980, cu tabata su ultimo dia riba e mundo aki.

Pink Panther su ultimo joyriding
Dialuna 15 di September den careda di 1’or y mey di merdia, un persona di fam, Thiel a presenta na warda di polis na Santa Cruz pa entrega un keho di ladronicia. Segun su persona desconocidonan a horta su Toyota Corola, color maron, numera A4545.


E auto cu Pink Panther y su amigo Diablo Preto a joyride for di dilanti un cas na San Fuego

Centrale post di polis a manda avisa tur unidad di polis di e auto horta
E auto tabata parada dilanti di un cas na San Fuego na momento cu e lo a wordo horta. Mesora despues cu e homber a entrega keho di ladronicia di su auto, Centrale Post a mand’e rond pa tur unidad di polis cu ta riba caya pa tira un bista riba e auto aki. Despues di basta rato un patruya a informa Centrale Post cu nan a mira e auto aki den cercania di Picaron, Santa Cruz Pariba y den e auto tabata tin dos hoben.

Buskeda pa e auto den area di Picaron
Mesora a pidi pa un patruya yudanan busca e auto caminda nan a mir’e delaster biaha, esaki tabata den careda di 4’or di atardi. Den careda di 5’or y pico un biaha mas den cercania di Picaron nan a bolbe mira e auto, e biaha aki nan a reconoce e chauffeur di e auto tambe, como Felix Luciano Werleman, alias Pink Panther. Felix tabata wordo buska pa algun caso pendiente cu Husticia. Den e auto na banda nan a reconoce un otro conocido di polis cu ta Arcado Angela alias”Diablo Preto”.

Polis a persigui Pink Panther y Diablo Preto
Polis mesora a sigui nan y tabata dunanan señal pa nan para, pero Felix e chauffeur, no a para y a sigui core pa polis. Ni pa nada, e no kier a para, segun nos a compronde tabata custumber caba di Pink Panther pa no sigui ordo di polis y core pa polis.


Caminda di Picaron unda Pink Panther a para e auto y e cu Diablo preto a sali na careda

Polis a los tiro di advertencia y Arcado Angela”Diablo Preto” a entrega su mes
Dilanti di un cas na Picaron nan a para e auto, aki ta caminda Diablo Preto lo tabata biba. Arcado a sali na careda bay direccion pariba y Pink Panther a drenta den un hanchi cerca di e cas y a core bay direccion panort. Ora e dos hobennan a cuminsa core polis, polis a los un tiro di advertencia den laira. Arcado Angela mesora a stop di core y a entrega su mes na autoridad.


Detencion a cay

Tiro cu tabata destina pa pia di Pink Panther, a alcans’e patras di su cabes
Pink Panther si no a worry cu e prome tiro di advertencia, e la sigui core bay direccion panort. Polis tambe a sali na careda bay su tras, e la core baha un cero y a bay direccion di un rooi, coriendo bayendo mas panort, na dado momento e polis a para y a los un biaha mas un tiro di advertencia den laira, pero nada, Pink Panther no a worry cu esaki tampoco y a sigui core direccion di e rooi.


Actualmente e Rooi patras di e cas na Picaron, unda Pink Panther a trata na huy pa polis


Varios alto funcionario policial na e sitio unda Pink Panther a wordo tira

Despues di e tiro di advertencia e agente policial a dicidi di los un otro tiro, pero e biaha aki e la dicidi di mik pa tira Pink Panther den su pia, pero net na e momento cu e la los e tiro, Felix a bula den e rooi cu tabata basta hundo y pa su mala suerte e bala a alcans’e net patras di su cabes. Asina mes Pink Panther no a rindi, e la sigui core pero djis algun meter so y despues a perde balans y a cay boca ariba y cu su mannan habri. E agente policial cu a los e tiro a ripara cu e la herid’e gravemente of miho bisa casi fatalmente.

Pink Panther a fayece na yegada na Hospital
Mesora e polisnan na e sitio a notifica autoridad y a manda pidi cu hopi urgencia pa un dokter na e sitio. Tambe nan a pidi pa presencia di ambulance cu sumo urgencia. E ambulance a yega prome cu Dokter na e sitio, pero mirando e situacion critico di e victima, ambulance no a perde tempo warda riba dokter y a dicidi di transport’e mesora pa hospital.

Na yegada na hospital dokternan no por a haci nada mas pa Pink Panther y a constata morto di Felix Luciano Werleman, alias Pink Panther, un hoben di 22 aña.

Nos a ricibi varios comentario relaciona cu e historia aki, den cual hopi ta bisa Pink Panther hamas por a bula den e rooi caminda cu polis a tir’e. Segun nos a compronde di algun persona di e tempo ey yega na Pink Panther, cu Pink Panther nunca a bay bula den e rooi y cu ta polis a tire pa motibo cu e tabata tin nan cansa cu su hortamentonan den Santa Cruz. Te hasta tin cu a bay asina leu di bisa cu ta un polis a tir’e den su cabes despues a lastr’e bent’e den e rooi esaki comentarionan di lectornan. Te hasta lo a haci cu un reconstruccion di e caso lamentabel aki caminda a confirma cu niun momento Pink Panther no a bula den e rooi. pa motibo cu tabata tin hopi mata di Kukwisa caminda cu polis a bisa cu e lo a bula.

Un contradiccion fuerte di locual a wordo publica e tempo ey y tambe locual personanan cu conoce  Pink Panther y e area aki ta bin ta bisando. Tempo ta pasa y hende ta bay, e aña aki a haci 40 aña caba di e caso lamentabel aki. Un cos Pink Panther a bay sosega y nunca mas lo bolbe pa conta kiko a pasa cu ne. Morto no por papia y e polis cu a tir’e so por a papia y tabata tin tur e chens di mundo y defende su curpa.

Diablo Preto deteni
Despues di e incidente , na e sitio por a mira varios Alto Funcionario Policial y tambe Fiscal tur a presenta pa pone nan mes na altura di e caso serio aki. Mientrastanto Arcado Angela ” Diablo Preto” a keda deteni . E arma cu e agente a uza pa tira a keda confisca pa mas investigacion.


Un poema hopi emocional dedica na Pink Panther, skirbi pa un amigo di dje

Nos di Arubanative.com no conoce e dos personanan aki y ni  sa ken tur ta nan famia, nos no sa con e bida di Sr. Angela a sigui despues di e sucedido aki. Ni ken e ta of ken tabata “Klukje” brother di Felix Werleman.

Lamentabelmente casonan asina te awe ta sigui sosode. Varios persona a yega di wordo tira fatalmente cu un arma reglamentario di polis, esaki durante un asistencia, hopi biaha pa motibo cu e sospechoso, no ta coopera cu polis, no ta respeta ordo di polis, of no ta haci caso di un tiro di advertencia den laira. 

Tristo con un hoben di 22 aña cu full un bida su dilanti, haciendo su cosnan di malbado, a fayece sin di a haya un di dos chens pa a drecha su bida y forma un futuro. Muy bien si e la haya guia y tratamento professional, e lo por a cambia y bira un persona responsabel den nos comunidad.

Felix Luciano Werleman, alias Pink Panther Sosega na Paz