Home History of Aruba Historia di Aruba: Tragedia pariba di Hudishibana, explosion a costa bida di...

Historia di Aruba: Tragedia pariba di Hudishibana, explosion a costa bida di tres persona

SHARE
????????????????????????????

E biaha aki nos lo dedica historia di Aruba, na un sucedido hopi tristo, den un tragedia tres militar Hulandes a perde nan bida durante un dia di training. Un eror humano di algun seconde cu a costa bida di tres persona, mientras 5 persona mas a keda herida, di cual dos tabata hopi grave.

Hudishibana, poco pariba di e cero aki, tabata tin antes un area caminda militarnan Hulandes tabata tene nan ehercicionan.


Hudishibana

Riba diamars 11 di Juli 1961, den oranan di atardi na momento cu solo ya tabata cuminsa bay awa, e parti nort di Aruba a wordo sorprendi pa un zonido fuerte, un explosion, cu por a wordo scucha di leu, especialmente den e areanan di Malmok, Westpunt y Hudishibana. E explosion a wordo sigui pa gritonan di susto, di tristeza y dolor cual a marca historia e atardi aki. Un dia hopi scur y un golpi hopi grandi den e circulo militar di Reino Hulandes di e tempo ey.

Ehercicio cu municion pisa
Diamars henter dia por a mira mariniernan hopi activo entrenando riba e tereno di ehercicio di mariniernan na e parti nort di Aruba, antes cada biaha cu tabata tin ehercicionan militar, nan tabata pone avisonan, pa e pueblo no yega cerca. Riba e diamars aki e mariniernan tabata haciendo algun training di guera cu municionnan basta pisa. Durante e ultimo training pa cera e ehercicionan aki, un grupo di militar mester a practica cu mortier di 81 mm.


Mortier di 81mm

Despues di algun training cu explosivo caba, e ultimo ehercisio tabata pa mas o menos 6’or di atardi, den cual nan mester a tira un serie di 3 brisantgranaten. Na momento cu nan tabata hincando e granatnan den e mortier, nan a bay mucho lihe, ora nan a hinca e di dos granat cu a wordo poni ariba e loop di e mortier, sin cu e prome granaat no a sali ainda for di e loop di e mortier, e granatnan aki a dal na otro na e boca di e mortier y a explota.


Explosion

Dos Marinier a fayece mesora na e sitio
E tirado, Marinier der Derde Klasse J.J. Struike di apenas 20 aña y tambe e ayudante, e Marinier der Derde Klasse M.C. Tulp di 19 aña, ambos kende tabata mas cerca di e explosion a fayece mesora na e sitio. Nan curpanan a keda completamente mutila y ni por a wordo reconoci. E Sargento di e mariniernan, A.K. Roeleveld di 44 aña, kende durante e training tabata e stukscommandant y alabes como waarnemer a keda seriamente herida, e la fayece den oranan laat di anochi na San Pedro Hospital.


San Pedro Hospital di Aruba

Cinco militar a keda herida
E Capitan di e mariniernan F.O.C. Schuch, como e prome oficial di Marinieskamp na Savaneta, tambe a asisti na e ehercicionan aki, mescos cu e Mortier Sectie Commandant, tweede Luitenant H.W. Van der Steeg. Shuch y Van der Steeg a keda seriamente herida na nan barica. E tweede Luitenant di Mariniernan M. Van den Graaf cu tambe a participa na e ehercicionan aki a wordo herida levemente. E marinier eerste Klasse C.k. M. Mens y L. Zijlstra kendenan tabata fungiendo e momentonan ey como e cargadonan di e municion tabata cu municion den nan man pa hiba na e mortier, na e momento ey nan tabata un poco leu, nan a tambe a resulta levemente herida.

E marinier cu ta cuida enfermonan, M. Bouman tabata na e sitio y despues di e explosion mesora a cuminsa duna prome auxilio. E transportacion di e heridonan hopi grave a sosode hopi lihe cu ambulance di Marinierskazerne mes, cual tambe tabata staciona na e sitio di training. Mientras tanto e luitenant R. Van den Hoven, a cuminsa pidi pa presencia di mas ambulance pa asina por transporta e otro heridonan.

Di tres militar cu a fayece
Den oranan laat di diamars anochi pa diaranson mainta a drenta e noticia cu e Sergant Roeleveld a fayece den San Pedro Hospital, e la fayece di e heridanan serio cu e e la ricibi na su cabes y na su barica, durante e explosion.

Un tragedia cu sigur a sacudi henter e poblacion di Aruba. Mientras tanto na Hulanda e famianan di e mariniernan cu a fayece a wordo informa di e sucedido tristo aki y tambe for di Korsou a yega Luitenant Kolonel di mariniernan Overste L.Pronk, pa asinta asisti na e entieronan.

Marinier Struike (20) tabata biba na Nijmegen y Marinier Tulp (19) tabata biba na Oosterbeek, ambos a fayece mesora na e sitio di incidente. Roeleveld (44) tabata casa, cu dos yiu y tabata biba na Aruba.

Comandante a manda un comunicado pa informa e situacion di e otro militarnan herida
Den un comunicado Comandante Heinen a publica, cu aunke e dos militarnan hospitaliza ta seriamente herida, nan situacion no ta di peliger di morto. E dosnan seriamente herida tabata Kapitein F.O.C. Schuch di (34) kende alabes ta prome oficial, Schuch tabata biba na Aruba, e tabata casa y tabata tin un yiu. E otro marinier cu tambe tabata seriamente herida tabata Luitenant di Marinier H.W. van der Steeg di (21), kende no tabata casa y tabata biba na Heemstede, Hulanda. Tambe nan a publica cu tin tres otro militar mas cu ta levemente herida, tabata trata di 2de luitenant der Mariniers M. van de Graaf (22) kenda tabata biba na Den Haag, Hulanda.
E otro tabata Marinier C.K.M. Mens (18) biba na Zeist y Marinier Zijlstra (19) cu tabata biba na Menaldumadeel Friesland. E ultimo dosnan por a sigui tratamento medico na e hospital di Savaneta Kamp mes.

E tres mariniernan a wordo dera cu honor militar
Oranjestad: Diaranson 12 di Juli 1961, a tuma lugar e entiero di e tres mariniersnan cu a fayece durante e entrenamiento pariba di California Lighthouse, acompaña pa dignitarionan di Gobierno, di Marine y di Polis, representantenan di e organizacion ” Onze Vloot”. Tambe di vereniging van Reserve Officieren, seccion Aruba y centenares di hende mas tabata presente pa rindi respet na e tres mariniernan aki cu a wordo ranca na un forma hopi cruel for di e mundo aki.


Gezaghebber di Aruba di e tempo ey Sr. Beaujon dfm presente na e entiero di e militarnan

E restonan mortal di sargento A. Roeleveld y di e mariniernan M. Tulp y A. Struike a wordo hiba santana despues di e ceremonionan religioso cu a tuma lugar den Kerki Protestant y Misa Catolico na Oranjestad.
E restonan mortal di e marinier Struike for di trempan tabata den Misa San Francisco na Playa, despues di un sacrificio di misa, e la wordo hiba cu shersh. Padernan Copray y Weenink a compañ’e pa Santana Catolico na Playa. Prome cu a drenta den santana, un grupo di marinier den uniform blanco a manda un tiro di salute, despues nan a presenta cu tamboer y pijper na honor di e mariniernan.

E restonan mortal di sargent Roeleveld y di marinier Tulp tabata reposa den Kerki Protestant na Playa y pa 4’or y 15 a cuminsa cu un sirbishi di misa cu a caba pa 4’or y 45, despues nan a wordo hiba pa Santana Protestant na Playa.
E stoet tabata hopi largo, e militarnan a wordo acompaña pa Gezaghebber di e tempo ey cu tabata Gezaghebber Beaujon kende a cana patras di e shersh y na banda di e shersh por a mira luitenant Kolonel di Mariniernan Overste L. Pronk y comandante di mariniernan na Aruba Majoor Heinen.
Deputadonan di e tempo ey, De Cuba, Visser y Jakobs, Comisario di e tempo ey De Jager y hoofdinspecteur Mol, tambe varios otro personan di Gobierno, comerciantenan y cantidad grandi di coleganan marinier a compaña e restonan mortal na nan ultimo lugar di sosiego.


Mariniernan para riba rij pa brinda honor na nan coleganan cu a fayece

E cayanan di Oranjestad tur caminda tabata tin gruponan di hende para ta warda e stoet pasa, esaki for di misa Protestant te na Santana fila largo di hende para canto di caminda. Un rato despues cu e stoet di Struike a yega santana, e restonan mortal di e dos otro militarnan tambe a yega na porta di santana protestant, for di leu por a tende hopi yoramento y varios hende buscando lugar pa para na e entrada di Santana, pa mustra nan respet na e fayecidonan of djis pa curiosidad.


Yegada di e stoet na Santana

Den Santana Protestant, despues cu e dos cahanan a wordo poni riba nan graf, e Vloot predikant di mariniernan Kruinen a haci un oracion chikito. Majoor Heinen a tene un discurso cortico, den cual e la conmemora y mustra e balor di e tres mariniernan cu a bay. Sargento Roeleveld tabata tin 44 aña di edad y tabata tin 25 aña den servicio militar. Majoor Heinen a sigui bisa cu semper e la mustra di ta un militar ehemplar. Tambe ela elogia e capacidad di e dos mariniernan Tulp y Struike kendenan tabata tin apenas 10 luna den servicio militar. Heinen: “Nan tres a muri pa e paz cu’e mundo liber tanto ta desea” asina e la caba su discurso.


Mariniernan cargando un di e cahanan 

Gezaghebber Beaujon tambe a dirgi algun palabra den nomber di e pueblo di Aruba. Dominee Visser na final di e ceremonia a reza un Nos Tata y rogando Dios pa descanso di alma di e fayecidonan. Tabata tin un cantidad grandi di krans cu a wordo deposita na e grafnan.

Den santana Catolico tambe a tuma lugar un ceremonia na honor di e marinier Struike. Aki Overste Pronk kende alabes ta representa e commandant di Zeemacht, a tene un discurso den cual e la bisa “cu mundo awendia cada bes ta yen di tension, ta necesario pa tene ehericicionan aki, aunke cu tin hopi bes consecuencianan peligroso manera den e caso aki, di e tres militarnan”.

Pader Copray tambe a tene un oracion pa termina e ceremonianan di e atardi. Den santana despues di e parti oficial esnan presente a haya chens di condoleer Sra. Roeleveld y su yiunan kendenan mester a sigui nan bida sin su esposo y sin nan tata.


Un momento hopi tristo na momento cu Sra. Roeleveld y su yiunan yorando ta mira con nan ta hincando nan ser keri den Graf

Fuente:Leidsche Dagblad, Arubaanse Courant, peticion di un persona anonimo cu tambe a duna informacionnan valioso