Caya Captain Rodgers, San Nicolas – Diaranson anochi algo pasa di 11 or di anochi, ta drenta un informacion cu un rato prome un persona a bay habri un bar den e caya aki y ta bin topa cu 4 persona for di tino benta riba vloer banda di e bar. Prome informacion a drenta na 911, unda cu a bati alarma na polis.
Hopi lihe polis a yega na e sitio y enberdad a bin topa cu e 4 personanan aki, un homber y 3 muhe. Un di e personanan tabata reaciona e otro tres nan no tabata reaciona mas. Polisnan a actua y a saca dos persona femenino pafo, uno tawata for di tino y e otro no ful na tino.
Mesora a pidi ambulance cu hopi urgencia, brandweer tambe a bay na e sitio pa asisti.
Varios unidad di ambulance incluyendo e pickup di First Responder di ambulance a presenta mesora nan a cuminsa trata e personanan na e sitio.
Mientras tanto polis a cera e area y a pidi pa presencia di slachtofferhulp. Tambe a pidi pa presencia di Departamento Tecnico di polis y recherche pa asina cuminsa cu un investigacion.
Banda di 9’or mas o menos, segun informacionnan e doño di e bar Latin Passion lo a cende un generator parti paden, e motibo ta desconoci ainda.
Esaki lo por a causa cu carbon monoxide (CO) a yena e luga, causando morto di dos persona.
Ta ser papia di e propetario y su pareha, y dos dama cu a wordo saca pafo cu tawata hala rosea pero poco poco.
Ambulancenan a transporta e dos damanan hoben pa Hospitaal, unda uno a yega for di conocemento y e otro si tawata poco bij pero hopi zonza.
Eynan mediconan a sigui atende cu nan.
Mester bisa tambe cu dado momento a start un discusion na e sitio entre Brandweer y Polis contra e Paramediconan.
Debi cu un Paramedico so a logra drenta e bar y por a constata cu e homber a fayece pero lamentablemente lo a wordo saca di e bar sin por a check si e dama por tawata tin señal di bida.
Esaki debi cu a surgi discusion tocante e CO (carbon monoxide), cu lo mester a wordo midi pero aparentemente esaki no a pasa.
Na cierto nivel di e gas (CO), solamente 5 minuut di ta exponi na dje por resulta fatal pa un persona. Carbon monoxide ta un gas sin color o holor cu ta wordo produci ora cu kima fuel. Esaki por yega nivelnan peligroso den areanan sera. Un generator por emiti nivel nan di carbon monoxide cu por wordo compara cu gas emiti for di 450 auto.
Na Merca entre aña 2005 pa 2017, un 900 persona a fayece di carbon monoxide poisoning pa via di generator. Pa es motibo e Consumer Product Safety Commission (CPSC) a dicibi di pone un label riba e sorto di generator nan aki bisando cu: uzando un generator paden por matabo dentro di algun minuut. Y pa nunca uza esaki paden di cas, hasta si portanan y bentana ta habri.
