E hecho ta cu dia 13 juli 2020 Obispado di Willemstad a retira e signatura catholiko di Stichting Voortgezet Onderwijs (SVOA). Dia 14 di juli 2020 e subsidio di gobierno a keda retira.
Mientrastanto, Obispo di Willemstad y Minister di Enseñansa, Ciensia y Desaroyo Sostenibel a yega na un acuerdo pa loke ta futuro di Colegio Arubano. Conforme e acuerdo aki:
a. Colegio Arubano, entrante prome di augustus 2020 lo keda administra door di Stichting Katholiek Onderwijs Aruba (SKOA);
b. a forma un comishon tripartite, consistiendo di tres miembro nombra pa Obispo di Willemstad, SKOA y Minister di Enseñansa, Ciensia y Desaroyo Sostenibel, pa discuti y determina e condicion nan bou di cua lo por pone Colegio Arubano di forma definitivo bou di SKOA;
c. e comishon aki lo mester entrega, mas tarda dia 15 di september 2020, un conseho unanime;
d. en caso dia 15 di september 2020 partidonan no yega na un acuerdo, Colegio Arubano lo cai bou autoridad di Minister di Enseñansa, Ciensia y Desaroyo Sostenibel.
Contrario na expresion nan hasi, entre otro den medionan di comunicacion, mayornan cu tin yui na Colegio Arubano, lo no mester inscribi nan yui mas na SVOA pa e aña escolar venidero. Mas den siman lo anuncia unda y di ki manera inscripcion lo tuma luga. E mayornan no mester preocupa pa cu nan yuinan lo haya les riba tur nivel.
Tambe e siman aki lo aserca e personal cu ta traha na Colegio Arubano, pa discuti nan posicion huridico entrante prome di augustus 2020. Den e contexto aki, Minister di Enseñansa, Ciensia y Desaroyo Sostenibel kier trese dilanti ku semper Directie Financiën a paga salario di personal cu ta traha na e diferente directivanan di scol subsidia pa gobierno, di forma directo na e empleadonan. Pago di salario di personal di Colegio Arubano ta keda garantisa.
Oranjestad, 21 juli 2020.
Minister di Enseñansa, Ciensia y Desaroyo Sostenibel