Ayo – Diabierna mainta den careda di 11:30 polis a wordo informa di un accdente di trafico na Ayo. Esaki tawata den un di e bochtnan cu area tin.
https://www.facebook.com/arubanative/videos/1216810721992246/?t=9
Na yegada polis a constata cu ta trata di un Suzuki Baleno stationwagen y un Ford pick up. E Suzuki Baleno station wagon ta esun cu a ricibi e sla mes. Padilanti tawata completamente destrui.
Na e sitio nos a compronde cu e Suzuki Baleno tawata bayendo zuid y den e bocht e Ford pick up lo tawata coriendo cu velocidad halto.
Aki ta unda cu chauffeur di e Baleno ta haye confronta diripiente cu e pick up y no por haci nada mas y ta dal frontal contra dje.
Den e Suzuki tawata tin tres persona, incluyendo un mucha homber chikito cu a dal su cabes. Pero e tawata mustra ok, asina mes a pidi pa un ambulance extra pa un control.
Den e Suzuki patras tawata tin un señora cu ta esun cu a ricibi golpi fuerte.
Segun nos a compronde e señora aki un dia prome lo a caba di haci un operacion.
Paramediconan na e sitio y cu ayudo di polis a logra saca e señora for di e porta di patras. Dado momento e stretcher a bay di banda unda cu e señora casi a cay. Danki Dios esaki no a sosode.
Mientrastanto un ambulance tawata yegadando na e sitio pa controla e criatura.
Polis di trafico a pidi presencia tambe di BFTO(departamento tecnico) pa saca algun potret, debi cu ta trata di un accidente basta fuerte.
Na final ambos ambulance a sali cu esnan herida direccion Hospital.
