Home International COVID-19: AstraZeneca kier prepara pa Reino Uni un 30 miyon dosis di...

COVID-19: AstraZeneca kier prepara pa Reino Uni un 30 miyon dosis di vacuna pa September

SHARE

E compania farmaceutico di AstraZeneca tin como meta pa prepara 30 miyon dosis di vacunacion contra coronavirus pa Reino Uni. AstraZeneca kier logra esaki pa September, y pa fin di aña e kier duna 100 miyon dosis di e vacuna.

Si e plan aki logra, e pais Ingles lo ta prome pa ricibi e vacuna. E vacuna cu na e momento aki ta den proceso di desaroyo na Universidad di Oxford lo ricibi un fondo di 79 miyon dollar. E vacuna ta ya den proceso pa ser studia riba persona, y ta premira pa dentro poco e estudio lo yega su culminacion.

Imperial College London lo haya un otro 21 miyon dollar pa asina purba acelera e trabou pa descubri y desaroya un posibel vacuna. Tur esfuerso ta wordo hinka den e posibel desaroyo di un vacuna. Tin como 100 diferente posibel vacuna den desaroyo.

Te na e momento aki ainda ningun compania farmaceutico o universidad a logra ta exitoso den nan trabou. COVID-19 a tuma bida di mas cu 312,000 persona, a infecta 4.7 miyon persona y a prueba di ta devastador pa e economia global.

E ta sumamente dificil pa desaroyo un vacuna den corto tempo y logra distribui esaki globalmente. E virus posibelmente tey pa keda, esaki Dr. Michael Ryan e director ehecutivo di World Health Organization (WHO) a declara siman pasa.

Gobierno di Reino Uni a hinka 158 miyon dollar den fondonan pa acelera e desaroyo di un posibel vacuna. Reino Uni ta premira pa zomer di 2021 un facilidad lo por habri trahando riba e produccion di e vacuna. E capacidad di produccion lo ta un 70 miyon dosis di vacunacion dentro di 4 pa 6 luna.