Bushiri: Diabierna anochi un rato despues cu Toque de queda a drenta na vigor, un patruya a bin topa cu un Nissan March riba caminda y a exigi e hoben tras di stuur pa para, pero esaki enbes di sigui ordo di polis a dicidi di manda su auto riba e polisnan y e la sigui core.
Esaki a sosode na altura di e Compleho di casnan di FCCA na Bushiri, mesora e polisnan a pidi refuerso di nan coleganan y a sigui’e Nissan March, pero e hoben tras di stuur a core staciona e auto y drenta paden di su cas.
E mayornan di e hoben aki, a core lock e porta di cas pa polis no drenta paden y bay cu nan yiu. Pero e yiu no a lag’e te eynan, e la sigui, via un bentana di camber e la sigui insulta y menasa polis.
Polis mesora a pidi un ordo di nan superior pa nan por drenta den e cas aki, si acaso e hoben nenga di coopera cu nan y no sali pafo di e cas.
Polis a papia varios biaha cu e personanan den e cas pa nan coopera, habri e porta y a bisanan bon cla cu si nan no habri e porta nan lo drenta na un otro forma den e cas.
Despues di basta rato e habitantenan a bin habri e porta di cas, mesora polis a drenta paden y a detene e hoben onbeschoft aki. E auto tambe a keda confisca y a pasa esaki den man di recherche pa mas investigacion.
