Pa e ocasion aki lo celebra e aniversario cu un procesion den cayanan di Oranjestad riba 19 di maart pa 6’or di atardi saliendo for di parkeerplaats di Universidad di Aruba.
Ta exactamente dos aña pasa cu Señor Betto Josepa a haya un vision den cual Señor ta pidi’e pa e hombernan di Aruba uni den Cristo Hesus resa e Santo Rosario. Tur diasabra un grupo di homber ta reuni den Hofi di Mama Maria na Playa pa resa e Santo Rosario.
E aña aki pa celebra e gran acontecimento aki, un procesion lo ser organisa den cayanan di Oranjestad, na unda lo resa specialmente pa Señor ilumina cientificonan pa haya un cura pa e virus cu tin e economia mundial den su gara. Si esaki sosode den nos pais cu ta biba di turismo, e lo trece consecuencianan fatal pa nos pais.
Ta pesey cu oracion so nos por pidi Señor y Santisima Birgen Mama Maria di Alto Vista pa pone nan man protectora ariba nos pais.
Cu cooperacion di Pastoor Stanislauw di Parokia di Playa encarga cu Pro Catedral e procesion lo ser organisa, na unda tur grupo di oracion di nos pais, famianan, gruponan, scolnan, gruponan uniforma, specialmente politiconan ta ser pidi pa asisti na den e procesion cu lo termina cu un Santo Sacrificio di Misa na Pro Catedral. No spera invitacion, especialmente nos politiconan, como nos dirigentenan ta boso deber pa tambe resa pa nos pais.
E atardi aki Santisimo lo ser saca for di Pro Catedral pa ta den e procesion, hunto cu e imagen di e Birgen peregrino di Mama Maria di Alto Vista. No tin nada mas bunita y emocionante pa Santisimo y nos Patrona stima pasa den e cayanan di nos Capital pa pidi proteccion y alabes bendicion ariba nos dushi pais Aruba.
Medionan di comunicacion ta ser pidi pa duna un cobertura grandi pa e evenemento aki. Conhuntamente nos lo haci’e un gran exito.
Cooperacion ta ser pidi na un persona o compania cu por yuda cu un ekipo di zonido, cu por ser uza durante e procesion. Por yama Atan Lee na 5628344.
Uni den oracion ta e forsa mas grandi cu por existi pa nos peticion por yega cerca nos Tata Celestial.
Mundo y nos pais mester di oracion den e momentonan dificil cu nos ta pasando aden.
Manera menciona, e procesion lo ta dia 19 di maart pa 6’or di atardi, saliendo for di parkeerplaats di Universidad di Aruba.