Siman a habri cu un bon noticia pa Aruba. Citgo a traspasa e refineria y e terminal pa e compania estatal RdA. E acto di traspaso a tuma luga dilanti gate di e refineria den presencia di Premier Evelyn Wever-Croes, Minister Glenbert Croes, Presidente di Parlamento Ady Thijsen y Parlamentario Setty Christiaans-Yarzagaray. Esaki ta e prome paso pa yega na terminacion di e contract cu Citgo y pa yega na reapertura di e refineria.
Señora Eva Schloss, ruman di Anne Frank tabata na Aruba y a comparti e storia di su bida y con ela sobrevivi e Holocaust. Un presentacion hopi bunita cu ta siña nos kico ta curashi y determinacion y ta mustra con importante tolerancia y amor pa otro ta. Cualidadnan cu awendia ta hopi importante.
Hunto cu colega Minister di Husticia, Premier Wever-Croes a reuni cu embahador di Reino na Washington, consul general na Florida y Minister Plenipotenciaro na Washington. A toca diferente tema di interes comun den e relacion entre Aruba y Merca.
Premier Wever-Croes a efectua e apertura di e training di “Signs of Safety” na varios profesional cu ta traha cu proteccion di menor. Esaki den esfuerso pa traha mas hunto y pa raporta na e mesun forma ora ta trata negligencia, abuso y maltrato di menor. Aruba ta bendiciona cu e profesionalnan aki cu ta dedica cu alma y cuerpo na esnan mas vulnerable den nos comunidad y Gobierno ta sigui inverti den nan.
Durante conferencia di prensa dialuna ultimo, Premier hunto cu Futura a lansa e competencia “100 Innovations” den cual lo premia e 100 miho ideanan/solucionnan di innovacion di e aña aki.
Hunto cu Minister Dangui Oduber, Premier a lansa e pilar economico di produccion y cultivo di cannabis medicinal pa exportacion, a base di un licensa na esnan cu cumpli cu condicionnan hopi estricto di siguridad y control di calidad.
Gobierno a anuncia oficialmente dialuna ultimo e intencion pa haya companianan interesa pa cuminsa cultivacion y exportacion di cannabis medicinal for di Aruba. E intencion ta pa haya varios compania cu por ‘competi’ cu otro, y cu lo tin 3 area specifico unda cu Gobierno kier pa e cultivacion cuminsa.
Premier a inaugura dos dia di workshop di e-Government pa departamentonan di gobierno. Pa e meta aki sr. Linnar Viik di e-Government Academy di Estonia a bin Aruba. Aruba ta avansando den e trayecto di e-Government, y e meta di e workshop ta pa informa con leew e proceso ta y con importante e proceso ta pa mehora calidad di bida di tur ciudadano di Aruba. Imaginabo no mester para den rij mas!
Diaranson ultimo Presupuesto 2020 pa Pais Aruba a wordo entrega na un manera digital na Parlamento di Aruba. Ta e prome presupuesto desde aña 2008 cu ta conta cu un surplus pa asina nos por hiba finansas publico den un rumbo solido.
Premier hunto cu Minister Lopez-Tromp a ricibi alumnonan di International School of Aruba na Bestuurskantoor pa un recorido educativo. Nan tabata tin algun pregunta hopi interesante.
Premier a reuni cu sra. Milly Schwengle, miembro di Raad van State pa Aruba na Den Haag. Como nos representante ta hopi importante pa sra. Schwengle ta na altura di e desaroyonan di Aruba.
Premier oficialmente a despedi di sra. Freda Croes como miembro di e comision di condecoracion di Aruba y a gradici sra. Croes pa e bunita tarea boluntario cu el’a ehecuta pa varios aña cu hopi dedicacion.
Yegando na e parti final di e resumen, Premier hunto cu Johnisha ta aparece den e Kalender di Maart di Fundacion “Sea Bunita, Sea Bo Mes”. Gabinete Wever-Croes ta para pa Inclusion y esaki ta un bunita muestra di esaki.
En conexion cu dia Internacional di Hende Muhe, 8 maart Premier Evelyn Wever Croes ta felicita tur nos hendenan muhe, y den su reflexion ta para keto na e papel di hende muhe den inspira y motiva otronan, den briya nan lus pa ilumina caminda di otronan y den Union ta logra cosnan grandi! Pabien na e forsa Femenino di Aruba!
Den cuadro di preparacion y prevention di COVID19, Minister di turismo, salud publico y deporte hunto cu Departamento di Salud Publico a tene un session informativo pa miembronan di AHATA. E meta tabata pa consientisa y brinda informacion na tur e miembronan pa nan por transmiti e mensahe na tur nan empleadonan pa tuma e medinan di prevencion necesario.
Diamars merdia Directie Volksgezondheid a tene un Live Facebook Session caminda a papia di Corona Virus y tabata tin oportunidad pa tur usuario di FB haci pregunta y ricibi contesta riba e tema di Corona Virus.
Dr.Horacio Oduber Hospital a tene nan conferencia di prensa informativo tocante di Corona Virus. Personal a sigui training y simulacro, protocol y cambernan di isolacion ta cla. Hospital ya ta algun tempo den preparacion pa coronavirus.
Durante henter e siman PR di Minister di Salubridad, Gobierno di Aruba y DVG a saca diferente ads y video informativo/ preventivo di coro a virus pa mantene e pueblo di Aruba informa.
Minister Dangui Oduber ta contento di por anuncia cu e borchinan di caminda di crus di kapel di Alto Vista a keda finalisa cu un diseño nobo. E proyecto aki a wordo financia cu fondonan di Ministerio di Turismo. E proyecto di kapel di Alto Vista a wordo haci cu consciencia y bou guia di parokia di Noord y hunto cu esnan cu ta atende cu e kapel.
Diahuebs Minister Dangui Oduber a reuni cu AHATA y comision fiho di labor den Parlamento. Presidente di e comision Shailiny Tromp-Lee a presidi e reunion aki. A trata e programa ‘Ami ta turismo’, un programa crea pa AHATA, sosteni pa Minister di Turismo, cu tin como meta pa conscientisa comunidad di tur e oportunidad y beneficionan cu tin ora bo ta traha den e industria turístico. Na mes momento kier crea e orguyo pa traha den e industria aki.
Manera priminti den campaña, nos a bisa cu nos lo percura pa clubnan deportivo haya artificial turf y diahuebs nos a anuncia cu Kudawecha ta e prome pa haya ariticial turf. Nos ta cumpli cu nos maneho y vision. Un maneho pa drecha facilidadnan deportivo na Aruba.
Minister di Enseñansa a insitui un management team na Departamento di Enseñansa di Aruba, cu lo bay enfoca riba e maneho financiero di e presupuesto mas grandi di Pais Aruba.
Minister di Enseñansa a participa na e exhibicion ArubaABC na Biblioteca Nacional, cu apoyo di World Literacy Foundation. E prome ArubABC buki, cu yama Mi Buki di Aruba di e autor Steffen Maas, ta enrikece nos acerca di materialnan educativo, ya cu nos muchanan por siña e letranan di alfabet relacionando esakinan cu nos realidad di Aruba.
Na Biblioteca Nacional tambe a tuma luga e presentacion di e buki Conoce Bo Isla di e autor Dina Maria, cu yudansa di UNOCA. Ta trata di un serie di 5 parti, cu ta un material hopi util pa nos scolnan, especialmente awor cu Papiamento a bira importante den nos enseñansa.
Minister di Enseñansa a mustra den su presentacion cu tin falta di material atractivo pa muchanan siña conoce nos historia, cultura, flora y fauna, y proverbionan.
Finalmente Minister di Enseñansa a firma un MOU cu Xavier University pa e programa di formacion di enfermeronan, cu ta contribui na e diversificacion di ofertanan educativo riba nos isla. Nos unico hospital a endorse e estudio aki y lo start na september na Xavier University, cu ta habriendo su campus ultra moderno cu ta den construccion.
Dialuna Minister di Husticia mr. Andin Bikker, hunto cu colega Minister di Infrastructura drs. Marisol Lopez-Tromp y den presencia di miembronan di Sindicato SINBA, a firma Ministeriële Beschikking pa institui un Taskforce cu cierto tareanan specifico pa yuda mehora e edificionan di Brandweer. Un di nan ta pa bin cu un stappenplan a corto plaso a base di un inventarisacion di e estado di e edificionan pa asina por mehora tur e edificionan. E Taskforce su tarea tambe lo ta pa duna recomendacion pa yega na un Post pa Dienst Brandweer na Santa Cruz. E miembronan di e Taksforce ta consisti di un representante di Ministerio di Husticia, un representante di Ministerio di Infrastructura, un representante di e leiding di Brandweer, Director di DOW of un persona apunta door di dje, Director di DIP of un persona apunta door di dje, y un representante di sindicato SINBA.
Minister di Husticia mr. Andin Bikker a reuni cu Embahador di Hulanda na Washington Sr. Andre Haspels y Minister Plenipotenciario di Aruba na Merca Sra. Joselin Croes, hunto cu miembronan di KPA, NCTVI y VDA. Den e reunion a adresa varios tema, entre nan cooperacion cu Merca y Hulanda riba Cybersecurity, ESTA, vigilancia di nos costa, human trafficking, y intercambio di data. Tur ta topiconan importante den cuadro di cooperacion cu departamentonan di Husticia di Merca.
Minister di Husticia mr. Andin Bikker no ta di acuerdo cu desicion di Ministerio Publico den e caso di turista Mericano cu a haya un boet. E desicion di Ministerio Publico pa duna solamente un boet den caso di un turista cu a comete un acto castigabel contra un menor di edad, a causa hopi conmocion den comunidad. Durante conferencia di prensa di Gobierno diahuebs mainta, Minister Bikker a trece entre otro dilanti cu e no ta di acuerdo cu e desicion cu Ministerio Publico a tuma den e caso aki. Ministerio Publico ta un instancia independiente pero no obstante esey, e ta diferencia di opinion cu nan y den e caso aki a participa esey tambe na Ministerio Publico. Aparte di e un ley cu el a presenta na Parlamento y cu ta cla pa trata pa aumenta castigo riba casonan asina, Minister Bikker ta bay pidi e comision cu ta conseha riba Codigo di ley Penal y Codigo di Procedemento Penal pa conseho con pa medio di por ehempel ‘aanwijzing voor opsporing en vervolging’ lo por duna instruccion na Ministerio Pubico cu casonan di e indole aki no por wordo manda pa TOM-zitting, pero mester wordo persigui y treci dilanti Corte. Tambe Minister Bikker a informa cu Fundacionnan tin derecho a base di articulo 15 di e Codigo di Procedemento Penal, pa apela tipo di decisionnan asina.
Los di esey ta presentando den cuadro di leynan cu el a presenta y tin pendiente na Parlamento, un nota di cambio pa amplia y duna esnan afecta mas derecho ora Ministerio Publico tuma un decision cu nan no ta di acuerdo cu ne. Minister Bikker a splica cu ora Ministerio Publico tuma un decision cu no ta bay persigui un hende pero e persona ta paga un boet, famianan of e victima tin e derecho a base di articulo 15 di Codigo di Procedemento Penal pa nan apela na Corte Comun. Den articulo 15 inciso 2 ta bisa tambe, cu Fundacionnan cu tin den nan Statuto cu nan ta proteha derecho di victima, tambe tin mesun derecho y por apela e decision.
Un nota di cambio lo keda presenta na Parlamento caminda ta bay amplia cu por ehempel e Ombudsman, Defensor di Pueblo, cu ta na Parlamento pa keda aproba, tambe lo tin un derecho pa apela. Asina por tin mas ‘checks and balances’ adicional ora un decision asina cay. Los di esey tanto na Hulanda como na Merca tin loke ta yama ‘extraterritoriale en rechtsmacht in strafzaken’. Cu esaki ta posibel cu, no obstante cu e hecho castigabel a tuma luga aki na Aruba, na Merca nan por atende cu e caso y persigui e persona.
E siman aki Minister Marisol Lopez-Tromp a ricibi alumnonan di International School of Aruba (ISA) klas 3 na Bestuurskantoor pa un recorido educativo. A duna presentacion di algun proyecto di Gobierno, a splica nan di e procesonan cu ta tuma luga prome cu decisionnan wordo tuma y a mustra nan con ta percura pa e informacion yega comunidad a traves di media. E alumnonan a haci bon uzo di e oportunidad! Nan tabatin pregunta hopi critico y nan a trece sugerencianan interesante. Ademas nan a conoce Prome Minister y diferente otro Minister.
Conhuntamente cu Minister encarga cu Husticia Andin Bikker, a firma un Ministeriele Beschikking (MB) pa instala un comision cu E meta primordial ta pa duna conseho riba e aspecto di e estado di edificionan di Brandweer y mantencion di e edificionan aki. Mantencion structural di edificionan Gubernamental pa hopi tempo ta un punto di atencion. Sinembargo cu instalacion di e ‘Task Force Infrastructurele voorzieningen Dienst Brandweer Aruba’, lo ta atendiendo cu e situacion aki pa edificionan cu DBA ta haci uzo di dje.
Diahuebs durante rueda di prensa di Gobierno di Aruba, Minister Marisol Lopez – Tromp a elabora riba un bishita haci e siman aki na e rioolwaterzuiveringsinstallatie (RWZI) na Bubali. Alabes a accentua e preocupacion di Gobierno cu e situacion na e planta, pa cual ta haciendo e maximo esfuerso pa remedia mas pronto cu ta posibel. Gobierno ta tumando pasonan pa remedia e situacion. ATA a pone e suma di 600 mil florin disponibel pa e ‘oxidatie sloot’ pa di e forma aki por cuminsa remedia esaki.