Willemstad, Korsou:
Awendia diariamente ta tuma lugá kòntròl riba uso di alkohòl bou di stür riba e isla, loke ta pone ku tin mas kasonan ku mester ‘doe af’. Pa motibu di esaki Ministerio Públiko (OM) a fiha un regulashon pa korementu di outo bou di influensia di alkohòl. Mirando ku por lo general e kòntròlnan ta tuma lugá ku un aparato pa analisá aliento, awor por konstatá mihó kuantu e persona bou di stür a bebe di mas promé ku el a kuminsá manehá un vehíkulo. Un tèst ku ta analisá aliento ta indiká si e shofùr a bebe mas di loke ta permití pa lei.
For di un numero di investigashon a resultá ku si un persona bebe mas ku 220 Ugl (mikrogra pa líter), su kapasidat pa manehá un outo ta baha. Pa e motibu aki e kontenido di alkohòl máksimo ku un persona ta pèrmití pa lei pa bebe ora e ta bai manehá un outo ta di 220 Ugl. Sinembargo den sierto kaso ta trata di un ekseso relativamente abou i den otro kaso ta trata di un infrakshon pisá. Ministerio Públiko ta tene kuenta ku esaki na momentu di stipulá un straf. Tur esaki ta stipulá den e Regulashon pa manehamentu di outo bou di influensia (‘de ‘Richtlijn rijden onder invloed van alcohol’), publiká pa Ministerio Públiko.
Ademas, for di awor Ministerio Públiko lo tuma reibeweisnan di personanan ku ta residivista (a detené e persona pa korementu di outo fuma na mas ku un okashon), a bebe di mas òf den kaso di aksidente. Den kaso di korementu di outo fuma pa un di dos bia Ministerio Públiko lo proponé un detenshon kondishonal. Un di tres bia, kore outo bou di influensia di alkohòl lo por hiba na enkarselashon den SDKK komo demanda di Ministerio Públiko.
