Home History of Aruba Historia di Aruba: Destino cruel a persigui un famia na Savaneta pa...

Historia di Aruba: Destino cruel a persigui un famia na Savaneta pa hopi aña

SHARE

Den un temporada hopi cortico, ruman, sobrino, tata a fayece, un tras y tur tragicamente

Den e añanan 1976,77,78 etc. e trafico na Aruba tabata hopi insigur. Tabata pasa masha hopi accidente di auto y cu hopi biaha resultado fatal y cruel.
Te hasta tin papia cu un di e añanan aki e percentahe di habitante compara cu e accidentenan fatal tabata un di e mas halto na mundo. Na 1978 den e prome tres lunanan ya Aruba a conoce 10 morto den trafico.

Awendia danki na hopi programanan di conscientisacion y hopi control den trafico di parti polis, a logra baha esaki drasticamente.

E caminda principal di San Nicolas pa Oranjestad a conoce masha hopi accidente fatal, muy en particular e parti di e caminda cu ta pasa den Savaneta.

E biaha aki nos kier dedica un articulo den nos seccion di historia, na un famia di Savaneta cu morto a persiguinan pa aña. E famia humilde aki a sufri di hopi dolor na curason, di mortonan repentino y cruel. Te hasta cu ora e telefoon di cas ring nan tabata tin miedo di contesta e telefon, paso nan no kier  a haya mas mal noticia. Nos lo relata un parti chikito di loke e famia aki a biba den.

Ta trata di famia Colina, Rosendo Colina a conta nos un poco di tur loke su famia a pasa aden.


Sr. Rosendo Colina hunto cu su Sra. Maria Colina

Ela cuminsa poco poco, cu diferente miembronan di famia tabata fayece un tras di otro. Pero Rosendo a conta cu nunca ela perde fe den Dios y semper cada biaha cu un famia bay laganan, e ta bisa cu mester conforma y cu ta boluntad di Dios. Rosendo ta un persona cu tin hopi fe y tin un curason grandi y fuerte.

Rosendo a conta cu su tata tabata un Venezolano cu despues cu su casa a fayece na Venezuela, ela bin biba na Aruba. Su di dos casa tabata un Arubiano y hunto nan a forma un famia. Algun ruman di Rosendo tabata biba na Venezuela y otro na Aruba.

Savaneta: Dia 7 di September 1977, a sosode un accidente fatal y horibel cu a kibra curason di full e famia. E ruman homber mayor Nemencio Colina, tabata biba cu su querida señora y yiunan na un cas banda di lama na Savaneta.


segun nos a compronde e ruman homber lo tabata biba aki nan hunto cu su famia

Riba e dia aki den oranan laat di anochi Nemencio a dicidi di bay bishita su mama, cu ta biba hopi cerca, e mama tabata biba riba e caminda principal di Savaneta, na bandi panort di caminda.

Segun Rosendo, su ruman a crusa e caminda grandi. Net na momento cu su ruman tabata drentando cura di cas di su mama, un auto Mericano grandi cu velocidad hopi halto a bin di pariba. Pa un of otro motibo e auto a subi acera y a dal Nemencio sin brake. E impacto fuerte a parti e curpa cruelmente den dos. Varios parti di su curpa a keda gespart rond.


Den e area aki e auto a subi acera y a alcansa Nemencio, e ruman di Rosendo

Mesora despues cu e accidente a pasa, e rumannan a cuminsa bisa otro di loke a caba di sosode cu nan ruman homber. Rosendo a keda encargo pa bay bisa e tata cu Nemencio a fayece. Na momento cu ela bisa su tata, e tata su curason a kibra y a contest’e, “Hesus, mi yiu no bisami e cos aki.”

Na momento cu e accidente a pasa e mama mes tabata drumi y no tabata sa kiko tabata pasando dilanti di su cas. Ta te ora ela spierta y a mira polis, su yiunan y mas hende na su cas, e ora ey Rosendo a brasa su mama y a bis’e cu su yiu homber mayor (segun nos a compronde su pret’i wowo) a caba di fayece, cu auto a dal’e. E mama no por a soporta e dolor, ela a cay den otro y a cuminsa yora inconsolabel.

Rosendo a conta nos esaki cu gemoed yen, despues di tanto aña ainda e partida cruel di su ruman homber ta haci’e dolor. Rosendo nunca mas no lo por lubida e partida di su ruman homber  y dolor cu esaki a causa henter e famia. E tabata un temporada hopi duro y hopi tristo pa e famia, mirando den ki forma nan ser keri a wordo ranca for di nan.

E corantnan tabata wordo scondi pa e mama, pa e no mira den ki estado e curpa di su yiu stima a keda. Paso e tempo ey corant tabata publica imagennan hopi grafico, especialmente esun di e curpa di su ruman cu a parti di den dos. Riba un potret por mira e polis na e sitio, Frido Werleman cargando e parti di e curpa cu a kita, ta increibel con un persona por a perde su bida di e forma aki.

Desgracia y morto a sigui persigui e famia. Rosendo a conta cu no ta mucho tempo despues cu su ruman a fayece, ela hiba un yiu homber cune.

Tabata mas o menos 10 aña prome cu morto di Nemencio, riba un atardi, Rosendo no por corda e fecha, ni e aña exacto, pero si ta corda cu e yiu muher di Nemencio Colina, cu tabata yama Roslyn tabata entre 12 pa 15 aña di edad. Ela dicidi di bay bishita su wela, esta mama di su defunto tata. Ela sali for di su cas banda di lama, elo a pasa riba e veld, pasa den e hanchi pa yega na e caminda grandi.

Na momento cu e tabata yegando na e final di e hanchi un cacho a core su tras, e mucha tabata tin hopi miedo di cacho y di susto pa e cacho no mord’e, ela core subi caminda. E mes a bay dal contra un auto cu tabata biniendo di pabou, e impacto tabata fuerte y e mucha muher a fayece na e mesun caminda unda su tata algun aña despues na un forma hopi cruel ta fayece.


E salida di e hanchi riba e caminda grandi

Diadomingo dia 5 di maart 1978, mas o menos 6 luna despues cu Nemencio a fayece, un otro tristeza a bati na porta di e famia aki. E biaha aki tabata trata di e yiu homber di Nemencio, kende a keda gravemente herida den un accidente hopi serio riba e caminda band’i lama na Savaneta.

Tabata den oranan di marduga algun amigo cu a sali y lo tabata bayendo bek cas pa ser exacto 4’or y 45 di marduga. Nan tabata bayendo cu velocidad halto direccion pariba. Na altura di ex Brisas del Mar Restaurant, pa un of otro motibo, e chauffeur Mario Duyn a perde control. E auto a baha caminda y a bay dal contra un muraya.


E auto den cual e 4 mucha hombernan hoben tabata.

Den e auto tabata tin 4 hoben, un hoben di 21 aña, Mario Duyn cu tabata stuur e auto, Randolf Maduro di 17 aña cu tabata sinta net su tras, ambos a fayece mesora na e sitio. E otro dos nan un tabata Alfonso Colina di 22 aña, cu a keda seriamente herida y tabata teme pa su bida. E otro tabata di fam Flanders tambe di 22 aña cu a keda levemente herida, pero asina mes ela wordo transporta pa hospital.

Alfonso a wordo interna den Intensive Care Unit, su situacion tabata hopi critico, ela keda mas cu dos siman ta lucha pa su bida. Lamentabelmente dia 21 di Maart 1978, Alfonso a perde e bataya y a fayece na edad di 22 aña. Esaki tambe tabata otro golpi duro pa e famia aki.

Rosendo a conta nos cu e aña 1977/78 tabata un aña hopi duro pa su famia. Despues cu e famia a despedi di su ruman homber Nemencio Colina y su dos yiunan, a drenta otro noticia tristo tata di Rosendo a fayece algun siman despues.

Rosendo cu su casa a conta, cu riba Diadomingo 21 di Mei 1978, otro dolor pa e famia aki, e biaha aki tabata trata di e casa di nan yiu muher. Lorenzo (Buchi) Schwengle tabata casa cu yiu muher di Rosendo. E pareha tabata tin un yiu muher chikito y tabata sperando nan di dos yiu. E yiu muher tabata hopi pega riba su tata, un mucha di mas o menos 1 pa 2 aña.

E diadomingo mainta ey, Buchi a trece e mucha pa e wela mira p’e paso e tabata bayendo pisca cu dos amigo. Ela pidi e wela pa no laga e mucha mira ora e bay,paso e ta yora su tras. Sin pensa kiko lo tabata sper’e, Buchi a bay.

Na caminda nan a topa Rosendo, Rosendo tabata hende cu conoce lama. Rosendo a bisanan pa mihor nan no subi lama, paso ela caba di bin di lama y lama ta hopi malo. Mas pio cu niun di tres no sa nada di boto y ni di lama, pero e tresnan aki a insisti toch di bay lama. Nan a bisa Rosendo cu ta poco pazuid ey mes nan lo bay.


Lama bruto

E tres amigonan tabata Lorenzo Schwengle, cariñosamente yama Buchi, Marlon Werleman qepd y un homber di fam Stamper. Tur tres tabata muchanan di Savaneta.

Buchi tabata bon landado, Buchi tabata yiu di Dominico Schwengle dfm. cu tabata un di e dos piscadonan cu na 1953 a keda colga pa 6 ora na un boto den un lama hopi bruto.


Fransisco y Dominico Schwengle kende tabata tata di Lorenzo “Buchi” Schwengle

Buchi tabata tambe sobrino di Fransisco Schwengle cu tabata e piscado cu wanta na un pida asiento di boto a landa  4 pa 5 miya pa yega tera, pa a busca ayudo pa su ruman Dominico y nan amigo cu a keda wanta na e boto. (Por lesa di e piscadonan aki mas den e seccion di Historia di Arubanative.com)

E tres mucha hombernan aki a subi lama y ora a pasa nada di nan regreso. Te atardi laat den careda di 6’or y 45, dos a logra yega tera cu e boto, tabata trata di Stamper y di Werleman. Segun nan version, cu toch nan a logra cende e motor y a yega tera bek.


Lama den e rifnan Savaneta

Segun e piscadonan aki nan tabata piscando na e area yama Cayon, cu lo ta keda entre 400 pa 500 meter for di costa, caminda cu nan lo a haya problema cu e motor. Segun nan version cu den careda di 4’or y mey di atardi Lorenzo Schwengle lo a bula na awa cu un container bashi di gasolin pa landa bay tera, pa asina busca ayudo. Pero nunca mas a yega tera. Mesora a saca boto di Marina pa busca Lorenzo Schwengle, pero mirando cu tabata birando scur mester a stop e buskeda,te pa su siguiente dia a sigui busca, pero sin resultado.


Lama di Savaneta caminda cu Buchi a bay y nunca mas a bolbe

Loke ta hopi straño den e caso aki, tabata cu ni Stamper, ni Werleman no tabata sa nada di boto, con nan por a logra start e boto? Mientras cu Lorenzo Schwengle tabata un bon landado y wanta na un container 400 pa 500 meter for di costa, elo mester por a yega. Pero e tempo ey no a haci niun investigacion, pa asina haya sa kiko exactamente lo por a pasa cu Buchi. Nan no ta piscado, pakiko net riba un dia cu lama tabata hopi bruto nan a sali bay pisca ? contra conseho di Rosendo kende ta un hende cu Si conoce lama bon.

Rosendo a conta nos cu ela bisa su yiu cu si anochi cera y Buchi no yega bek, e no ta bin bek nunca mas. E yiu muher a keda cu su tristesa y na Augustus 1978 e baby cu e tabata spera di Buchi a nace. Un yiu homber cu nunca a conoce su tata. Buchi a bay laga su dos yiunan sin tata. Algun tempo despues e yiu muher di Rosendo a bay biba na Merca.

E mesun aña aki, 1978, Rosendo a perde un otro ruman homber y su tata.

Na 1981 mama di Rosendo a fayece, no kere cu morto no a sigui haci e famia aki dolor. Rosendo a conta nos cu na 1994 ela perde un yiu homber cu tabata polis, Hubert Colina, miho conoci como Gigi, e tabata tin 36 aña di edad. Na 2010 ela perde un nieta di 26 aña. Despues di esaki Rosendo a haci un operacion di lomba cu a bay fout, ela keda invalido y ta actualmente den rolstoel.

Nos por siña di Rosendo Colina, un persona maravilloso y admirabel, un persona cu a haya asina hopi golpi di bida, pero cu no a laga nada kibr’e. Un persona cu ta conforma cu tur loke a pasa y na varios ocasion a bisa nos, “BO NO POR BRINGA BOLUNTAD DI DIOS, SEMPER CU FE DEN DIOS Y ACEPTA DIOS SU BOLUNTAD”. Esaki ta e forma cu Rosendo Colina a acepta tur e tristesanan y e turbulencianan grandi cu a pas’e den su bida.