Willemstad, Korsou:
Pa motibu di un denunsia di FIU (Financial Intelligence Unit Curaçao, ántes MOT) na aprel 2019, Ministerio Públiko a hasi 44 proposishon di transakshon na makelar i negoshantenan di auto. A hasi e denunsiá despe ku tabatin un ‘pilot’ kaminda a investigá makelarnan i negoshantenan di auto ku no ta registrá na FIU. E registrashon aki ta obligatorio pa personanan i instansianan ku ta kai bou di e lei kontra labamentu di plaka. Ta un echo kastigabel pa no ta registrá na FIU.
Ministerio di Públiko ta konsiderá e registrashon di esnan ku tin un obligashon di mèldu, manera makelarnan i negoshantenan di outo, di gran importansia. E registrashon ta e komienso di e responsabilidat di e empresarionan pa mèldu transakshonnan inusual. Investigashon di kliente i mèldumentu di transakshonnan inusual ta pilarnan importante den kombatimentu di labamentu di plaka i finansiamentu di terorismo. E mèldumentu di transakshonnan inusual ta esensial pa hasi mas difísil posibel pa kriminalnan pasa sèn for di baho mundu pa sirkulashon di plaka legal.
Despues di a manda e proposishon di transakshonnan na fin di aprel 2019, ku tabata trata di butnan te ku 1500 florin, hopi di esnan ku tin obligashon di mèldu a registrá na FIU. Ministerio Públiko ta satisfecho ku resultado aki. Sinembargo, tin di esnan ku tin obligashon di mèldu ku ainda no a registrá i ku no a paga e transakshon.
E empresarionan aki a risibí un ‘aanmaning’ di Ministerio Públiko pa paga e transakshon ainda. Finalmente, sinku empresa no a paga e transakshon i no a registrá na FIU. Ministerio Públiko a dagfar e sinku empresanan aki. Ta trata aki di dos negoshante di outo i tres makelar.
Banda di e sinku empresanan ku a haña un dagfar, tabatin algun empresa ku tabata kompletamente inalkansabel i/òf ta parse di no ta eksistí. A presentá e empresanan aki na Kamara di Komersio pa un investigashon pa asina deregistrá for di Kamara di Komersio.
Un resultado positivo di e proyekto aki ta un subida di registrashonnan di e empresanan ku tin obligashon di mèldu na FIU. Ta trata aki tambe di empresanan di otro sektornan lòs di e proyekto manera abogadonan, dunadónan di servisio hurídiko i fiskal i servisionan di ‘trust’. Den estrecho koperashon ku Ministerio Públiko, FIU lo sigui pidi atenshon pa e registrashon na FIU i mèldumentu di transakshonnan inusual na FIU.
Pa mas informashon tokante registrashon i mèldumentu na FIU por subi riba www.fiucuracao.cw.