Grote Berg, Korsou:
Djárason 8 di yanüari 2020, alrededor di 10.29 or, Sentral di Polis a risibí notifikashon ku na un kas na Grote Berg, dos (2) kachó di rasa, ta atakando un hòmber. E promé patruya ku a yega na e sitio a nota e dos (2) kachónan aki den e kurá di e kas ariba menshoná.
E kachónan tabata bastante agresivo. Pa por a drenta e kurá/kas e agentenan mester a hasi uso di nan arma reglamentario pa pone e kachónan aki drumi. Den e kas tabatin un hòmber di 47 aña di edat, ku heridanan grave na kachete/garganta i bou di su brasa robes ku tabata sangra bastante. For di un investigashon preliminar a sali na kla ku e kachónan ta di bisiña i a bula kurá drenta den e kurá di e víktimá pa ataká nan kachó.
Na momento ku e víktima a bai na lòs su kacho pa hinka esaki den kas, e kachónan di rasa aki a atak’é ku e konsekuensia ariba menshoná. Ambulans a transportá e hòmber víktima pa C.M.C. pa tratamentu médiko. Investigashon den e kaso aki ta kontinuá.