Willemstad, Korsou: Relashoná ku e kaso di tiramentu ku morto ku a tuma lugá dia 5 di yanüari 2020 (komunikado di prensa 006/2020), personal di reshèrshi a detené riba e mesun fecha aki e hòmber sospechoso E.E.P.C. nase na Repúblika Dominicana di 17 aña di edat. E detenshon a tuma lugá den Basorapretuweg, alrededor di 16.00’or.
E sospechoso aki, durante di su detenshon tabatin algun fraktura i leshon ku el a risibí durante di e bringamentu ku tabatin promé ku e tiramentu. El a risibí tratamentu médiko i a aseptá su kulpabilidat den e kaso di asesinato aki. Mas lat, alrededor di 17.35’or, polis a detené e dama sospechoso N.C.L. nase na Kòrsou di 20 aña di edat den Heersstraat, komo kómplise den e kaso aki. Ámbos sospechoso a keda presentá dilanti di un fiskal ouksiliar ku a ordená nan enkarselamentu pendiente di mas investigashon.