WILLEMSTAD – Promé buèlta di temporada regular di RBI Curaçao 2019 ta tras di lomba i ayera anochi den Tio Daou Ballpark a inisiá e buèlta di dòbel eliminashon pa asina na final korona e kampion di e aña aki. Den e promé buèlta e 7 ekiponan a hunga un total di 13 wega i na final di esaki Van Engelen Giants a keda na kabes ku un rèkert di 10 gana 0 pèrdí i 3 empatá, bon pa 33 punto. Manera ta konosí e temporada aki RBI su kampionato tabata konsistí di solamente di divishon Senior di hóbennan di 16 pa 18 aña.
Pa loke ta e wega di ayera, e ekipo di Royal Scorpions (5-7-1) a logra un viktoria di 6-4 riba St. Michiel Astros (7-4-2). Scorpions komo ekipo bishitante a sali fuerte den nan promé turno na bate anotando 4 kareda. St. Michiel tiki tiki a kòrta den e bentaha aki i drentando último ining di wega, skor tabata pèrta 4-3. Den nan último turno na bate Scorpions a anotá 2 kareda di siguransa mas i asina e wega bin finalisá ku skor di 6-4. Picher ganador pa Scorpions tabata Failyson Anthony kende a tira 5 ining fuerte permití 3 kareda riba 4 hit, duna 4 base por bola i poncha 2 bateadó. Pa Scorpions tabatin 4 bateadó ku 1 hit. Picher pèrdèdó pa St. Michiel tabata Ethan Cova i Mairoshendrick Martinus a bai di 4-2 na bate. St. Michiel Astros awor mester gana nan próksimo wega pa asina keda ku speransa pa gana e título di kampion di RBI 2019 si no kontrali nan ta keda eliminá.
Torneo RBI 2019 ta kontinuá mayan na Tio Daou Ballpark ku kuater wega importante ya ku awor tur wega ta konta pa keda na bida. Por sigui tur desaroyo di e kampionato via di e website nobo www.rbicuracao.com, unda por haña tur informashon, skema di wega, orario i resultadonan. RBI Curaçao tin su propio twitter account tambe bou di @Curacaorbi i ya manera sa kaba tin e página riba Facebook.
RBI Curaçao 2019 ta kai bou di ouspisio di Curaçao Baseball Development Foundation (CBDF) i kampionato ta bou di maneho di Fundashon pa Nan. Danki un biaha mas na MCB pa ta spònser prinsipal, Hensley Meulens i por último KNBSB.