ORANJESTAD — Pa prome biaha desde 2008, Aruba lo tin surplus den su Presupuesto. Gabinete Wever-Croes a marca e prome Surplus den nos presupuesto despues di 12 aña. Presupuesto 2020 tin un surplus di 0.5%. Na aña 2008, 2003 y 1993 tawatin surplus. Cu esaki, ta di 4 biaha cu nos presupuesto tin un surplus desde cu nos ta pais pero e diferencia ta cu esaki ta basa riba un strategia y maneho financiero structural. Esaki, Prome Minister a enfatisa, ta suppose di keda asina tambe. Surplus den nos presuepuestonan pa futuro mester keda structura. Esaki lo pasa contal cu tin un gobierno responsabel. Gabinete Wever-Croes a tuma desicionnan pa pone e pais den e rumbo financieramente stabiel pa e keda asina tambe pa nos futuro generacionnan.
“No tawata facil, pero danki na e vision, dedicacion y e compromiso di Gobierno di Aruba y e sacrificio di pueblo, awe nos por cuminsa paga nos debe bek y baha e debe mas ainda den 2020. Pa aña 2021 nos ta cuminsa sinti mas alivio y mira e inversionnan cu pa hopi aña no a wordo haci den nos comunidad. Pa aña 2019 tambe, Gobierno ta cerando cu cifranan hopi positivo”, Prome Minister Evelyn Wever-Croes a duna di conoce.
Prome Minister ta gradici tur colega Minister cu a haci sacrificio tambe y contribui na un Presupuesto 2020 balansa. Epecialmente, Prome Minister a gradici Minister di Finansa Xiomara Ruiz-Maduro y su ekipo di finansas y Ministerio di Finansas cu a traha cu empeño y dedicacion pa logra esaki.
Principalmente, Prome Minister ta gradici comunidad en general, nos pueblo cu a kere den vision di Gabinete Wever-Croes y a kere den e cambio cu e Gobierno aki lo trece na bienestar di su pueblo pa cambia e rumbo financiero desastroso y negativo cu nos pais tawata bayendo aden, pa e rumbo positivo di bienestar y progreso.
“Danki pa boso sosten y sacrificio. E no ta facil pero nos a logra e prome paso: un presupuesto sin deficit. Hunto nos a logra y ta logrando pa asina nos por laga un miho pais, un miho Aruba pa nos futuro generacionnan. Nos ta paga e debe cu nos generacion a ocaciona y nos lo pasa un miho futuro na e generacionnan nos dilanti”, Prome Minister Evelyn Wever-Croes a expresa.