ORANJESTAD — Dialuna mainta Prome Minister Evelyn Wever-Croes y Minister di Finansa Xiomara Ruiz-Maduro, a anuncia e bon noticia riba tereno financiero. Gabinete Wever-Croes a logra cera presupuesto balansa pa 2020, cu surplus manera acorda den e maneho financiero y economico di Gobierno di Aruba y cu Hulanda. Prome Minister a expresa cu esaki a wordo logra cu hopi sacrificio, vision y dedicacion di Parti di Gobierno di Aruba como tambe e Pueblo di Aruba. Apesar cu no tawata facil, hunto a logra e bunita resultado cu awe por anuncia e bon noticia aki pa nos pueblo.
E situacion financiero cu Gabinete Wever-Croes a encontra casi 2 aña pasa cu a drenta Gobierno, tawata, manera Prome Miniter a expresa, “Nos no por a kere loke nos a encontra”. Gobierno a encontra un situacion financiero hopi penibel cu un deficit di casi 300 miyon florin. Gobierno a logra baha esaki pa 155 miyon florin pa aña 2018. Sinembargo e situacion financiero a keda dificil. Y hunto mester a tuma pasonan duro pa pone Aruba bek riba e rumbo di finansas saludabel.
E deficitnan, e debe redobla den apenas 5 aña di gobernacion di e Gobierno anterior, tawata e causa di inflacion, causa di stagnacion economico, causa cu no por a inverti den enseñansa, den cuido di salud y cuido di di nos grandinan, entre otro.
“Den menos di dos aña, despues di decisionnan dificil, basa riba un vision, sacrificio, y compromiso pa saca Aruba for di e problema financiero, conhuntamente nos a logra presenta un presupuesto balansa. Por bisa tambe cu Gabinete Wever-Croes a marca e prome Surplus den nos presupuesto despues di 12 aña. Esaki solamente por a wordo logra door di dedicacion y un maneho structural di un Gobierno serio y responsabel”, Prome Minister Evelyn Wever-Croes a duna di conoce.
.