Tanki Leendert: Diabierna den oranan di anochi presencia di polis a wordo pidi cu hopi urgencia na altura di Citgo Tanki Leendert, pa motibo cu tin un dama eybanda cu tabata basta bou influencia di alcohol y of droga, e dama tabata no solamente causando molester, pero tambe e tabata forma peliger riba caya pa su mes y pa otro.
Na yegada e agentenan policial a bin topa cu e dama aki y mesora a ripara cu enberdad e dama ta basta bou influencia y no ta descarta cu e por ta bou influencia di otro substancia tambe. Na e sitio nan a bin compronde cu e dama aki tabata den un auto cu mas hende y pa motibo cu e tabata haci hopi fastioso, e personanan den e auto a dicidi di bahe canto di caminda na Tanki Leendert. E desicion di baha e dama canto di caminda sigur no tabata uno responsabel, mirando den ki estado e dama tabata, e miho opcion lo tabata pa hib’e su cas of bah’e na un Warda di Polis.
Polisnan na e sitio mesora a dicidi di detene e dama y a pidi pa un transportwagen, esaki no a cay den bon tera cerca e dama bou influencia, pero e agentenan no por a laga e dama den estado cu e tabata riba caya, elo por haci daño na su curpa y sigur por forma peliger riba caya pa su mes y pa otro tambe.
Transportwagen di polis a bin buska e dama, esaki pone e dama bira mas razo ainda, e dama a cuminsa expresa su mes no mucho bunita y tabata grita e agentenan policial “F… …”. Na Warda di polis e dama a haya un camber gratis pa sosega te ora e bin bij. Den e cel na Warda di polis e ta mas sigur y ora e bin na tino bek, elo gradici e agentenan policial pa a tuma e desicion aki.