Kralendijk – Durante e convencion di Dutch Caribbean Nature Alliance di e aña aki biologonan di e diferente parkenan, entre otro Fundacion Parke Nacional Aruba, STINAPA Bonaire, Reef Renewal Foundation Bonaire, CARMABI Corsou, Saba Conservation Foundation, Sint Maarten Nature Foundation, STENAPA y CNSI di Sint Eustatius lo reuni dia 28 di october awor pa un dia completo di workshop. E enfoque principal lo ta riba restauracion di coral, cu conocemento cientifico y practico. E Organisacion Hulandes pa Estudio Cientifico (Nederlandse Organisatie voor Wetenschappelijk Onderzoek-NWO) y World Wildlife Fund (WWF-NL) tambe lo tei presente. Ademas di participa na diferente workshop, Arjan de Groene di WWF-NL lo duna un presentacion tocante e Plan di Accion pa Restauracion di Coral di e seis islanan den Caribe Hulandes y Joseph Stuefer di NWO lo elabora riba un anuncio cu proximamente lo sali, pa proposicionnan di estudio cientifico den Caribe Hulandes.
Coral como e fundeshi di Caribe Restauracion di coral ta halto riba agenda mundialmente y esaki no ta un excepcion na nos islanan den Caribe Ulandes. E naturalesa unico di e area aki di Reino tin coral como fundeshi y ta rondona pa coral. Saba y Sint Eustatius ta di origen volcanico mientras cu Aruba, Bonaire, Corsou y Sint Maarten ta forma pa
structuranan di fossiel di coral di for di tempo cu nivel di lama tabata mas halto. Cu otro palabra, nos region Caribense den Reino ta traha riba rif di coral di miyones di aña bieu.
Importancia actual di coral Tradicionalmente semper turistanan a bishita nos islanan pa admira e aspectonan unico di nos region su naturalesa, incluyendo e rifnan di coral mundialmente conoci. Den un sondeo haci na 2013, e balor economico di servicionan di ecosistema brinda pa naturalesa na Bonaire, Saba and St. Eustatius tabata representa 31%, 63% y respectivamente 24% di e Producto Interno Bruto (GDP) di e islanan. Na Sint Maarten estudionan recien di nan Nature Foundation a mustra cu rifnan di coral ta contribui cu USD 50 miyon na e isla su economia. Esaki ta mustra claramente cu naturalesa ta e motor tras di tur e seis islanan den Caribe Hulandes su economia. Si no tuma accion adecua contra di loke actualmente ta menasando rifnan di coral, nan balor lo baha considerablemente y esaki lo tin consecuencianan enorme pa bienestar di e habitantenan.
Excursion Como parti di e solucion pa promove recuperacion di coral, Coral Restoration Foundation Curaçao y Reef Renewal Foundation Bonaire, entre otro, ta enfoka riba e futuro accionnan pa restaura e ecosistemanan balioso aki. Pa medio di presentacion y un excursion organisa pa Reef Renewal Foundation Bonaire, e biologonan presente lo tin e oportunidad pa mira algun metodo proba pa restauracion di coral cu nan mes wowo. E workshop aki lo brinda e biologonan un plataforma pa intercambio di conocemento y experiencia tocante e diferente programanan y tecnicanan den Caribe Hulandes pa restauracion di coral.
Charla gratis: status di rifnan di coral E tema di rifnan di coral ta e liña cora durante e reunionnan di e convencion di DCNA, mirando cu e salu di e rifnan di coral ta crucial pa e prosperidad duradero di e islanan riba termino largo. Pa tur cu ta interesa na sa mas y cu ta comprometi ku e tema aki, lo tin un charla gratis tocante e status di rifnan di coral na Bonaire. Esaki lo brinda oportunidad pa por conoce e expertonan regional personalmente. E charla ta na encargo di Dr. Erik Meesters di Wageningen University and Research y ta tuma luga dialuna 28 di october di 7:30 PM pa 9:00 PM na Captain Don’s hotel, Kralendijk, Bonaire.