Pos Chikito/Balashi: Diabierna algo prome cu 11’or di anochi, Polis ta wordo informa di un accident hopi serio cu 5 persona herida na e brug di Green Corridor, unda dos auto lo a accidenta y cay di e brug.
Mesora a saca unidad di materiaalwagen, varios unidad di polis y ambulance pa bay cu urgencia na e sitio.
Na yegada nan a topa cu un Nissan Tiida color cora benta den e mondi bou di e brug y un Altezza color scur cu a bay cay un poco mas leu. E heridonan tabata e 4 ocupantenan di e Nissan Tiida y e chauffeur di e Altezza.
Mesora a cuminsa cu e trabounan di rescate, nan a cuminsa libera e heridonan for di e autonan y tabata carganan trece nan ariba pa asina personal di ambulance ponenan riba e brancard pa hinkanan den e ambulancenan. E ambulancenan tabata staciona riba e brug cla pa sali bay direcion di hospital. Entre e heridonan tabata tin un criatura, un mucha muher chikito di mas o menos 3 aña.
Na e sitio nan a bin compronde cu e Nissan Tiida Y e Altezza tabata bayendo direccion Oranjestad y aparentemente e Altezza tabata biniendo cu velocidad halto y no a calcula e distancia entre su auto cu e Tiida y a dal su tras poniendo cu ambos auto a bay cay for di e brug den e mondi. E criatura di mas o menos 3 aña tabata den e Tiida.
Personanan cu tabata riba e caminda na momento cu e accident a sosode, a core baha abou, pa yuda e victimanan. Un dama a hiba e mucha ariba y ta corda con e mucha tabata keha di dolor na su garganta y stoma.
Tur 5 victima a keda rescata y a wordo hiba ariba unda personal di ambulance a pone tur riba brancard y a transportanan pa hospital.
E caminda a keda pa basta rato cera pa trafico, mientrastanto cu polis tabata haciendo investigacion.