Prome Minister Evelyn Wever-Croes semper a expresa e importancia di hende muhe den liderasgo y esaki no tawata diferente durante e siman na Nacionan Uni na unda Premier Wever-Croes a pone hopi atencion riba e tema di e posicion di hende muhe y con pa crea mas oportunidad pa e ser femenino por bay padilanti. Na e desayuno cu Prome Minister a organisa a asisti diferente hende muhe den posicion di liderasgo. Un intencion imporante tawata pa discuti diferente posibilidad pa stimula muchanan muhe pa sigui den e ramo di technologia pa asina por contribui mas den e futuro desaroyo riba e tereno aki. E reunion aki, segun Prome Minister, tawata uno sumamente fructifero na unda a asisti un cantidad di ser femenino exitoso cu diferente area di experticio cu alaves a duna nan compromiso pa yuda Aruba crea mas oportunidad pa nos mucha y hobennan femenino y asina prepara nan miho pa futuro.
Premier Evelyn Wever-Croes tawata tambe un invitado na un evento organisa pa UN Women titula “She Decides” na unda e tawata parti di e panel. E discusion di e evento aki tawata riba cuido medico y acceso pa cuido medico pa hende muhe. Manera ta conoci, na Aruba AZV ta duna e cuido medico na e ser femenino pero keto bay tin preocupacionnan cu e tema di embaraso hubenil pa motibo cu esaki por ta un obstaculo pa e hoben por sigui studia cu por strobe tambe pa para riba su pianan den futuro. Premier Wever-Croes a enfatisa e importancia di empodera e hende muhe, for di mucha caba, pa asina nan por tin un miho futuro.
“Ta hopi importante pa nos no permiti niun hende stroba nos den e meta pa empodera e hende muhe mas y bira exitoso. Ta di lamenta, cu riba e tereno internacional ora ta toca e tema di derecho di hende muhe, no ta haña e mesun atencion of e atencion necesario y esaki ta algo cu sigur mester wordo cambia,”, Prome Minister a enfatisa.
Finalmente Prome Minster di Aruba a reuni cu Director Ehecutivo di UN Women, señora Phumzile Mlambo-Ngcuka. UN Women ta un organisacion di Nacionnan Uni cu ta dirigi specificamente riba e posicion di hende muhe, e derecho di hende muhe y e oportunidadnan cu tin cu crea pa hende muhe. Durante e reunion aki a bin na un compromiso cu UN Women ta bay yuda Aruba den stipula e maneho y bin cu institucionnan firme cu por atende cu e problemanan di e ser femenino pa asina por crea mas oportunidad pa nan. E Director Ehecutivo di UN Women a haci un apelacion na Prome Minister pa sigui cu e lucha pa e derecho di hende muhe ya cu ta costumber cu solamente ora tin un ser femenino den posicion di liderasgo, atencion ta wordo poni na e tema aki cu ta asina importante ya cu hende muhe mester tin mesun derecho cu hende homber.
Prome Minister a gradici e Director Ehecutivo di UN Women, señora Mlambo pa e compromiso cu nos pais den yuda nos den e proyecto importante aki. Esaki sigur ta un logro grandi pa nos pais y pa nos mucha y hendenan muhe en general na unda cu e hende muhe por haya mas oportunidad pa desaroya den igualdad den tur tereno. E meta ta pa no laga niun hende atras.