MACUARIMA, ARUBA: Diaberna 30 augustus 2019 Cuerpo Policial Aruba a cera e luna cu 77 agente policial cu a huramenta, ricibi diploma y tambe gradua di MBO y MKO.
Scol di Polis E.J. (Watty Vos) tabata e sitio na unda a haci un ceremonia oficial y special den presencia di Minister di Husticia Sr. Andin Bikker, Alto Comisario di Polis Sr. Andrew Hoo, Hefe di Scol di Polis Sra. Jeannete Richardson-Baars, comisarionan di diferente departamento, famia y amigonan cu tabata presente pa presencia e ceremonia special aki.
E grupo grandi 77 agente policial ta ser parti den diferente klasnan y rango.
13 polis nobo di klas 2018 den trayectoria di aspirant a huramenta,
17 polis di klas 2017-1 a caba nan prome 2 aña y a ricibi nan diploma Niveau 3,
16 polis di klas 2017-2 a caba nan prome 2 aña y a ricibi nan diploma Niveau 3, e 2 klas nan aki lo haya un rango nobo di agent in opleiding pa agent eerste klasse.
15 polis cu ta termina nan estudio exitosamente y ta ricibi nan diploma di MBO, esaki nifica cu nan lo cambia di rango agent eerste klasse pa brigadier,
16 polis di klas 2018 cu ta ricibi nan diploma di MKO, awor nan lo asumi nan responsabilidad pa un rango mas halto cu ta Hoofd agent.
Nos comunidad por ta orguyoso y satisfecho cu nos ta hayando polisnan nobo pa mantene e orden publico pero den mesun rosea e meta ta pa nos por tin polis nan educa y profesional pa brinda e servicio na nos comunidad y combati criminalidad. E echo ta cu nos organisacion ta hoben cu sanger hoben pero cu e curason y balentia pa hiba Aruba na un otro nivel den seguridad y pa nos por tin mas polis riba caya pa proteccion di cada cuidadano. Masha pabien na e polisnan cu awor a huramenta, esnan cu ta na mitar caminda cu a ricibi nan diploma y tambe na e polisnan cu a termina nan estudio policial di 4 aña exitosamente y por ultimo awor nos ta conta cu mas polis studia y profesional cu experticio halto den nos organisacion policial!