Cunsumi alcohol y subi tras di stuur ta keda un problema na Aruba. Awel e biaha aki chauffeur burachi no a keda solamente deteni, pero a wordo agredi, pa ocupante di e otro auto. Menos mal cu e dama chaufeur di e otro auto a keda levemente herida, pero su yiu kende tabata sinta na banda den auto, si a wordo deteni pa motibo cu ela rabia asina hopi y a agredi e chauffeur burachi.
Chauffeurnan ta keda cunsumi alcohol y kere cu nan por core auto sin problema. Alcohol y stuur auto no ta bay, e chens ta grandi cu si bo no causa un accident, polis por para bo y bo ta keda deteni, den ambos caso bo por bira un headline den noticia.
Mane e lema ta bisa ” Si bo bebe no stuur y si bo ta stuur no bebe”.
Avenida Milo Croes, Oranjestad: Diabierna den oranan laat di anochi ta sosode un accident riba Avenida Milo Croes, na altura di Stadion Guillermo Prospero Trinidad. Presencia di polis a wordo pidi cu urgencia pa motibo cu cos a cuminsa bay for di man, entre e ocupante di un di e autonan y e chauffeur di e otro auto.
Na yegada nan a bin compronde, cu un homber bou influencia tabata tras di stuur di un Hyundai Accent V-car y esaki a dal contra un Suzuki Ignis berde. E impacto fuerte a sosode na momento cu e Suzuki Ignis cu tabata biniendo di pariba a bay pa bira na su man robes pa bay stadion y e Hyundai Accent a bin cu velocidad halto di pariba y a dal nan tras.
Despues di e impacto e ocupante di e Ignis kende tabata yiu di e chauffeur di e Ignis a sali hopi rabia for di e auto y a cuminsa agredi e chauffeur bou influencia di e Hyundai Accent. Ambos a keda deteni y transporta pa Warda di polis.
Polis a pidi pa presencia di un ambulance pa motibo cu e señora cu tabata tras di stuur di e Ignis a keda levemente herida. Despues cu personal di ambulance a trat’e na e sitio, nan a transport’e pa hospital.