Reina Beatrix International Airport a keda paralisa pa basta rato na momento cu a haya algo parecido na “Bomb” scirbi den un avion di Jetblue.
Sabana Berde: Diahuebs pa 1’or y 25 di merdia e avion di Jet Blue a yega for di JFK airport (New York) e pasaheronan a baha y e pasaheronan cu lo mester aborda e avion ya tabata para na Gate# 6 wardando pa asina e avion ta cla nan por aborda. Durante cu e cleanernan tabata haciendo e avion limpi nan a bin topa cu algo sospechoso, riba un di e stulnan den e avion tabata tin skirbi algo parecido na ‘Bomb”, nan no a confia esaki y a dicidi di avisa grens politie, kende na nan turno mesora a bati alarma.
Mesora tur e avionnan cu tabata riba rampa a wordo hala pa e parti zuid di e pista, pa asina esnan concerni por a cuminsa cu un buskeda extenso, polis a haci uso di e cachonan special pa buska bom, e bomb squad di KPA tambe tabata presente y hunto cu Marina Real a cuminsa cu e buskeda, pa asina por caba di buska mas lihe cu ta posibel, mirando cu ta trata di un orario hopi druk na Airport. Tambe pa evita mas retraso den e buelonan cu mester sali den e siguiente oranan. Durante e buskeda pa e supuesto bom, e caminda nan den area di airport tambe a wordo cera.
Niun bom no a wordo haya riba e avion, te na e momentonan aki no a detene niun persona tampoco, pero e investigacionnan ta wordo haci pa haya sa ken of kendenan a haci esaki. Bom melding ta un crimen y tin un castigo pisa di prison pa esnan cu haci nan mes culpabel na esaki.
E tin hopi consecuencia, paso mester cera e airport, niun avion no por baha ni subi, un perdida enorme financieramente pa e Airport y e airlinenan. Camindanan den vecindario di Airport ta wordo cera, trafico ta pega, fila etc. Tambe mester manda yama un team special, pa realisa e buskeda pa e bom, cu no ta staciona na Airport (ta tuma algun minuut). E ta perhudica tambe un gran cantidad di pasaheronan cu lo yega laat nan destinacion y por perde nan conexionnan, of kizas mester cancela nan buelo, cambi’e pa otro dia, tin hopi airline cu ta cobra un boet (penalty fee), nan mester paga pa nan hospedahe. E ta costa hopi hende inocente hopi placa innecesario. Pesey mes bom melding no ta algo pa haci joke cune mes.