Mas y mas ta Sali na cla cu gobierno MEPPORRED no ta trahando pa sirbi interes di pueblo, pero ta trahando pa sirbi interes di esunnan mas yega na partido, mas yega na Ministernan di e gabinete actual.
Parlamentario pa fraccion di AVP, sr Michael Lampe a mustra cu fuera cu Minister di Enseñansa ta hibando un maneho sin pia ni cabes pa loke ta enseñansa den su totalidad, e falta di suficiente fondo pa logra un miho educacion pa nos muchanan, ta bolbe keda demostra e siman cu a pasa.
“Despues di e ‘bijeenkomst’ siman pasa cu Minister Lampe, diabierna un carta di advertencia pa Gabinete Wever Croes di CFT, ta mustra cu e actual gobierno tin prioridadnan cu no ta sirbi interes di nos pueblo.
Ora cu analisa e carta di CFT, por ripara cu un biaha mas e comision di supervision ta señala cu Gabinete Wever Croes ta sigui sin por reduci gastonan di gobierno, gastonan di personal manera cu gobierno a priminti di haci for di momento cu e gobierno a wordo forma.
Ta un secreto publico cu gobierno no a cumpliendo cu promesanan haci na pueblo, esta di reduci gastonan di personal, gastonan di gobierno pero CFT no ta mira cu ta cumpliendo cu promesanan haci dor di mesun gobierno aki, na gobierno di Hulanda y na e comision di supervision financiero.
Un contraste enorme ta momento cu Minister di Enseñansa durante di e bijeenkomst siman pasa ta mustra cu no por suspende decisionnan cu el a tuma, entre otro pa loke ta e proyecto di Tra’s Merdia, ya cu no tin fondo pa sigui ehecuta e proyectonan premira pa enseñansa.
Tur esaki apesar cu Gabinete Wever Croes a introduci medidanan caminda lo ranca for di pueblo e suma di 270 miyon florin y sin cu por mustra kico ta bay haci cu e placa extra aki pero cu ta bisto cu e placa aki ta pa cubri e programa politico di e tres partidonan den coalicion.
Sin duda loke ta mas serio ta e hecho cu CFT ta exigi di gobierno pa introduci su di dos parti di e reforma fiscal cu ainda no a keda cla y cu lo bay crea un buraco di miyones den presupuesto 2019 cu a wordo aproba pa Parlamento.
Gobierno tin te dia 28 di juni proximo pa cumpli cu e puntonan aki de lo contrario CFT lo manda un conseho pa Conseho di Minister di Reino, pa impone u Koninklijk Besluit contra Gabinete Wever Croes, contra di Aruba.
E carta di CFT ta mustra bon cla cu gastonan di gobierno ta sigui aumenta, cu no ta cumpliendo cu promesanan haci pa reduci e gastonan aki caminda entre otro por mira con tin decisionnan ta wordo tuma y claramente ta decisionnan pa cumpli cu amigonan di gobierno, amigo- y sponsornan di partidonan cu ta forma e coalicion.
Gobierno a presenta un plan di maneho economico y financiero cual e mes no ta cumpliendo cune pero CFT ta sigi mustra manera ya a bira un custumber caba, cu gastonan di gobierno ta sigui subi y ta premira cu esaki lo no caba por lo pronto.
Gabinete Wever Croes no ta cumpliendo cu e maneho cu e mes a informa Hulanda y CFT cu e lo bay ehecuta pa drecha e situacion financiero cu principalmente Prome Minister Evelyn Wever durante y despues di campaña a bisa pueblo, sin cu lo tuma medida contra pueblo.
Cu awor CFT ta manda bisa e mesun gobierno aki cu nan no ta cumpliendo cu palabracionnan haci, no ta nada straño of nobo pa Gabinete Wever Croes, ya cu ora un gobierno no tin problema pa gaña henter un pueblo, ta mas cu claro cu e gobierno aki ta trata di gaña gobierno di Reino y CFT y no cumpli cu e protocol cu nan mes a firma na luna di november di 2018,” Parlamentario Michael Lampe ta declara.