Arthur Dowers, miembro di fraccion di AVP den Parlamento, ta mustra cu ta keda confirma cu Gabinete Wever Croes, simplemente no ta un gobierno pa pueblo pero ta un gobierno cu tey pa sirbi amigonan y sponsornan di partido.
Segun sr Dowers ta mustra cu tanto den gobierno como den parlamento, representantenan di MEP no ta trahando na interes di pueblo pero na interes di nan hendenan di partido, sirbiendo interes politico prome cu interes di pueblo.
“Claramente siman pasa esaki a keda demostra ora cu ta tristo pa bisa, c’un maestro di scol miembro di fraccion di MEP den persona di Edgard Vrolijk, ta presta su mes pa pidi un ‘bijeenkomst’ na luga di sostene e peticion di fraccion di AVP pa un reunion publico di parlamento, pa atende cu e situacionnan cu tin den enseñansa.
Pero kico Vrolijk aki ta haci, ta fabrica e bijeenkomst den cual Parlamento no por ordena Minister Lampe pa cambia su maneho of mande cas pa laga otro cu por si haci e trabou aki, simplemente pa sirbi interes di su gobierno di coalicion.
Aki claramente e Parlamentario di fraccion di MEP a scoge pa e interes partidista na luga di e interes di enseñans den su totalidad y e cos ey ta un berguensa pa un maestro di scol comete e traicion aki contra su coleganan cu ta hibando un lucha contra e incertidumbre cu Minister Rudy Lampe ta ocasionando.
Sinembargo e mentalidad politico aki, e falta di lealtad na pueblo pa sirbi interes di pueblo msa cu tur cos, ta keda manifesta den cantidad di otro asunto, caminda Vrolijk y su fraccion tambe mester actua pero no ta actua na interes di pueblo.
Minister Lampe a mustra durante di e bijeenkomst yama pa Vrolijk y fraccion di MEP, cu e no por cumpli cu peticion di fraccion di AVP cu a solicita pa suspende tur e cambionan cu e ta propone di haci, te ora cu tin un discusion amplio cu tur envolvi riba e rumbo cu tin cu sigui den enseñansa.
Segun e mandataerio e no por haci esaki, e no por cambia cierto cosnan ya cu practicamente e no tin placa pa ehecuta su maneho y sirbi enseñansa manea cu e mester ta pero di otro banda e no papia of menciona con su gobierno ta gastando placa cu cosnan cu no tabatin prioridad.
Un di nan sigur ta huurmento di e edificio pa Serlimar na Pos Chikito, caminda a firma un acuerdo c’un sponsor di e partido cu ta partner di coalicion pa casi 30 mil pa luna, cu sigur lo por a yuga paga e airconan cu awor ta wordo retira pa e compania cu no ta hayando su pagonan manera mester ta.
Mesun cos cu e proyecto di helikopter, caminda tambe un Minister di mesun partner di coalicion cu tin dos asiento, a dicidi di busca un helikopter caminda tin cu paga e suma di huur di 200 mil pa luna sin cu esaki ta duna resultado desea.
Cu e proyecto aki tambe tabatin cosnan straño den e proceso di aanbesteding caminda tur cos ta mustra cu interes di personanan yega na e partido aki, a wordo beneficia den esaki pero placa pa airce y security na scolnan, simplemente no tin NADA, absolutamente NADA
Pueblo no ta bin na prome luga pa Gabinete Wever Croes ya cu mientras cu tin problemanan grandi tur caminda, pueblo ta wordo castiga cu medida sin fin, cu mas medida na caminda anuncia pa CFT pero tin Ministernan cu ta biahando rond mundo, bishitando Venetia, Italia, Oslo, y otro ciudadnan Europeo, na Sur America y hasta den Caribe.
Tin un Minister Plenipotenciario cu ta na Aruba atrobe, mescos cu ta trein e ta subi bin Aruba pero tur esaki ta sigui ocasiona aumento di gastonan di gobierno y cual tanto CFT como gobierno di Reino ta adverti cu nan tin cu haci,” Parlamentario pa fraccion di AVP, Arthur Dowers a declara.