Parlamentario Endy Croes cumpliendo cu parti di su trabao tabata presente diahuebs atardi na Surfside Marina momento cu Minister di Finansas, Asunto Economico y Cultura Sra. Xiomara Maduro a presenta e Maneho Economico 2019-2022 bao di e nomber oficial “Maneho Economico Fuerte y Resiliente pa Pais Aruba 2019-2022”.
Den un sala di Surfside Marina completamente yen di invitadonan y actornan importante pa nos economia tanto di sector priva como sector publico, Minister di Economia Xiomara Maduro a duna un presentacion den un forma bastante amplio. A presenta e Vision Economico di Pais Aruba, condicionnan actual, crecemento economico sostenibel, moviendo dilanti pa futuro y e 6 sectornan prometedor cu lo carga e vision.
Minister Presidente di Gabinete Wever Croes mr. Evelyn Wever Croes tambe a hiba palabra gradiciendo Minister di Finansas y tur cu a aporta pa e documento y vision importante aki. Minister Presidente Evelyn Wever Croes a agrega cu e maneho aki solamente por wordo implementa cu cooperacion estrecho entre sector priva, sector publico, den cooperacion cu nos sectornan civico y academico. Tambe Evelyn Wever Croes a subraya cu esaki no ta trata solamente di un desaroyo economico pero un desaroyo economico sostenibel y balansa unda nos conciudadanonan por biba un bida digno di un calidad halto. Pues un desaroyo economico cu nos pais por carga y cual lo ta na interes di tur hende. Pues e mester ta na interes di pais Aruba, interes di e comerciante, interes di tur conciudadano. Alabes Minister President a splica un poco di e-government cual lo bira un parti importante den e proceso aki. Imagina bo un dia cu bo no mester para den rij mas pa haya bo papel di Afl 5,- of e dia cu bo no mester para den rij mas pa bo number di auto of e dia cu bo por yena bo aangifte di belasting online. Tur esakinan ta forma parti di e vision total.
Despues Director di departamento di Asuntonan Economico Sra. Maria Dijkhoff Pita a hiba palabra sigui pa 3 representante di promising sectors, Director di Cosecha Joanne Dirksz, Presidente di United Farmers Association Sr. Gregory Fung A Fat y Sr. Diego Acevedo di Blue Rise kende ta concentra entre otro riba energia renobabel. Asina finalmente e Maneho Economico 2019-2022 a keda oficialmente presenta.
Banda di Minister Presidente Evelyn Wever Croes y Minister Xiomara Maduro, Minister Dangui Oduber, parlamentarionan Shailiny Tromp Lee, Sue Ann Ras, Hendrik Tevreden, Edgard Vrolijk y Endy Croes tabata presente na e ocasion aki cual ta un ocasion hopi importante.
Pabien Gabinete Wever Croes, Pabien Minister Xiomara Maduro y pabien sector priva, sector publico y tur cu di un of otro manera a brinda nan experticio y sosten pa desaroya y conclui e plan y Maneho Economico Fuerte y Resiliente 2019-2022 marcando historia como cu ta promer biaha esaki a tuma lugar den historia di Pais Aruba.