ORANJESTAD – Siman pasa den conferencia di prensa Minister di Turismo sr. Dangui Oduber a anuncia cu 29 di mei binidero lo tin e prome edicion di Island Fest. Despues di hopi contratiempo esaki lo ta un realidad, e festival aki lo reemplasa loke tabata e Carubian Festival.
Pa sostene e maneho di Turismo unda ta trece turistanan di calidad, a crea Island Fest. Island Fest lo organisa 1 evento pa luna, cu lo ta den e districto di San Nicolas. E festival aki lo duna e turista e valor pa su placa. A scohe e fecha di 29 di mei pa e prome edicion, esaki debi cu ta high season y ta den e siman di Soul Beach Music Festival.
“Den e siman nan cu ta sigui lo tene un conferencia di prensa unda lo duna mas detayes over di Island Fest y con esaki lo ta. Tambe pa invita e comunidad pa sostene e evento aki pa e bira un exito rotundo” esei Minister Oduber a bisa.
Minister Oduber ta kere firmemente den desaroyo economico pa San Nicolas y Island Fest ta forma parti di e desaroyo aki. Ta hopi atencion ta wordo duna pa stimula movecion, stimula trafico di hende y actividad economico. Minister Oduber di awor caba ta invita communidad di Aruba pa assisti na e evento grandi aki dia 29 Mei 2019.