Mama di 2 yiu a wordo posiblemente choca y mata. E sospechoso principal ta e mesun tata di su yiunan

Tobelstraat – San Nicolas, Diamars mainta 10’or ambulance a bay un adres den Tobelstraat pa un caso serio, unda un persona lo no ta duna señal di bida. Na prome instante a pensa kizas cu e persona aki cu ta un dama y alabes mama di 2 yiu lo por a haci su mes un daño.

Paramediconan durante cu e minuutnan tawata pasando a cuminsa nota cosnan straño na e curpa cu no ta normal.

Hunto cu polisnan ya nan por a mira cu no por a papia mas di un morto natural, esaki basa ariba loke nan a constata.

No oficial ta mustra den direccion cu e dama lo a muri door di chocamento, loke sa pasa hopi den casonan di drama pasional.

Di parti polis a haya e siguiente informacion:
Bon dia

“Awe diamars mainta pa mas o menos 10or di mainta alarm central ta notifica central di polis di un caso na Tobelstraat San Nicolaas di un señora cu no ta duna señal di bida den su cas.
Na yegada di patruya na e cas ta topa cu personal di ambulance . E señora den e cas no ta duna señal di bida y ta mustra di no ta un morto natural.
A pidi presencia di recherche y tambe polis technico.
Fiscal tambe a presenta na e sitio y slachtofferhulp.
Pa .11:25 dr Texier ta constata morto di e señora R.R.N.K. naci na Aruba di 33 aña di edad. Fiscal a laga tuma curpa den beslag .

Un hende homber a ser deteni y hiba warda di polis pa mas investigacion”.