Cumana/Watty Vos Boulevard – Diadomingo atardi polis a wordo pidi cu urgencia panort di e projecto di Viaduct patras di ex – Codemsa.
Ariba e caminda cu ta ser construi un persona tawata tin un persona wanta. E motibo tawata cu e homber of hoben aki y otro dos mas, nan lo a caba di horta 2 brommer na Meiveld.
Tawata trata di brommernan marca Pulsar.
Manera habitantenan a haya falta di e brommernan nan a bay direccion di e Projecto patras di ex- Codemsa. Pakiko of con nan tawata sa di bay e direccion ey no ta mucho duidelijk.
Eybanda nan a puntra rond y nan a haya informacion cu berdad nan a mira tres persona cu e brommernan. Nan tawata ariba e caminda den construccion di Watty Vos Boulevard bayendo direccion Sero Patrishi.
Ey ta caminda cu e doñonan a miranan ta luchando cu e brommernan, bayendo direccion nort.
Coremento a start
Ora cu e ladronnan a mira cu nan a wordo haya nan cuminsa core, pero nan no tawata sa cu e doño por a sprint basta duro y a logra pone man ariba uno.
Mesora a wante y a yama polis. E otro dosnan tin miho condicion y a core bay bay. Pero, ya nan sa ken nan ta y posiblemnete ta biba den Sero Patrishi.
Nan ta logra haya ambos brommer horta y un otro mas cu nan tawata tin pa yuda lastra.
Mas polis a yega y sali busca den e mondi y becindario pero no a logra haya e otronan.
Tur tres brommer a wordo confisca pa mas investigacion. Transportwagen a yega na e sitio y a hiba un di e ladronnan gara pa warda. Segun nos a compronde, e hoben ladron aki lo a pidi pa yama su mama pe, ora e tawata den boei.