Chauffeur di un Kia Sportage blanco numera A 66779, ta reverse y ta hera dal un ciclista, for di eynan a cuminsa un discussion cu a bay for di man y a caba na un intento di asesinato, na momento cu e chauffeur ta dal e ciclista intencionalmente cu auto.
Malmok: Diadomingo 10 di Februari, den oranan di atardi a drenta informacion di un accidente na altura di Boca Catalina, un auto lo a dal un ciclista y cu e ciclista ta herida. Enberdad na yegada, polisnan a topa cu e ciclista levemente herida cu varios rasca na curpa y tabata keha di dolor. Personal di ambulance a transporta e ciclista pa hospital y departamento di trafico a presenta na e sitio pa haci mas investigacion.
E incidente aki no a keda na un accidente entre un auto y un bicicleta, pero despues cu autoridad a tuma declaracion di varios testigo y di e victima mes, e accidente aki a haya full un buelta y a bira un intento di asesinato. E accidente aki a wordo cometi intencionalmente pa e chauffeur R.B., kende tabata tras di stuur di su Kia Sportage Blanco.
E problema a inicia, ora cu e chauffeur di e Kia Sportage a bay reverse, na momento cu e ciclista lo tabata acercando, ela hera dal e ciclista y for di eynan a start un discusion, cu tiramento di palabra. E chauffeur di e Kia Sportage, a sali bay tras di e ciclista, haciendo expresionnan menazante. Na dado momento e problema a bay completamente for di man, ora e chauffeur a dicidi di dal e ciclista intencionalmente. Segun testigonan a bisa cu e homber R.B. despues di a dal e ciclista kier a bandona e sitio, pero pa un of otro motibo a dicidi di para su auto riba un distancia y cana bin na e sitio di accidente.
Despues cu Fiscal a tuma nota di e declaracionnan di e victima y di e testigonan, ela duna ordo pa mesora detene e homber R.Banwari. E sospechoso di intento di asesinato a keda deteni mas o menos un siman despues di e incidente. E ta deteni na warda di polis na Noord y actualmente e caso ta bou investigacion, e ta wordo interoga pa recherchenan y a presenta caba dilanti Fiscal y Huez Comisario.
R. Banwarie ta un empleado di un compania grandi di lease y huur auto, su acusacionnan ta hopi serio, e ta wordo acusa di intento di asesinato y maltrato serio den cual un persona a keda herida.