Paradera – Diamars merdia algo prome cu 1’or y mey, ambulance y polis di trafico ta bay na altura di Hong Kong Supermarket na Paradera, pa un accidente di trafico.
Informacion a sigui drenta cu den un di e vehiculonan cu a accidenta tin un baby. Na yegada di ambulance mesora nan a bay atende e baby y a haci un checkeo medico completo cune. E baby tawata sinta patras den su Childseat, pues manera cu mester ta.
E accidente a sosode momento cu e pick up Ford Ranger a para na salida di e supermarket, pa duna e Chevrolet Spark chance pa subi caminda. Un Chevrolet S10 color blauw biniendo di pariba no a nota cu e Spark tabata subiendo caminda y a dal contra dje. E baby tawata sinta den su Childseat den e Chevrolet Spark.
Durante e impacto fuerte e Spark a spin, debi cu awa a caba di yobe, ela slip bay dal contra e pick up Ford Ranger cu a dune chance pa subi caminda. Tur tres vehiculo a haya daño material.
Polis di trafico a presenta y a tuma tur datos. Paramedico di ambulance a controla e baby y danki Dios tur cos tawata bon cune.