Oranjestad – Aruba
Manera Motor Unit ta haci tur aña durante actividadnan grandi di Carnaval, e aña aki lo no ta diferente. Pues controlnan ariba camindanan lo ta visibel, e ultimo dianan di Carnaval 65 nos dilanti.
Eta un manera pa trata na minimalisa chauffeurnan core bou inflluencia y asina trece nan bida y di hende inocente den peliger.
Mester bisa cu lamentablemente e casonan di chauffeurnan coriendo auto bou influencia ta diariamente, y no tin un ora specifico den dia cu esaki ta sosode. Pues antes bo lo pensa kizas anochi so hende ta bebe paso nan a sali trip.
Esey no ta e caso mas, tempo a cambia y polis ta topa cu chauffeur tanto masculino y femenino burachi den oranan di mainta. Siman pasa polis a detene un muhe envolvi deb un boksmento 10’or di mainta, paso ela core auto burachi y causa un accidente.
Di parti Cuerpo Policial nos a haya e resultado di e Motor Unit su controlnan durante y despues di Jouvert Morning.
“Controlnan Unidad Motorisa a sigi durante y despues di Jouvert riba primeramente pa coremento bou influencia di alcohol. Unidad Motorisa a para diferente camindanan di salida for di Jouvert entre otro na e retonde di Pos Chiquito.
A para mas o menos 300 auto y pone e chofer nan supla door di e alcosensor como e investigacion temporario.
Di e chofernan cu a supla 12 a surpasa 220 Ugl y nan a wordo deteni y hiba warda pendiente di mas investigacion. Un chofer a haya multa pa core sin rijbewijs. 4 di chofernan deteni pa core bou influencia di alcohol nan rijbewijs a wordo kita.
Un conseho na tur chofer di brommer ora polis dunabo un señal pa para djis cumpli cune sino inecesariamente bo ta trese bo bida y di esun cu ta cubo ariba e brommer den peliger. Esaki ta e caso di e chofer di e brommer ariba e potret y na manera tactico Unidad Motorisa a logra para e brommer y e chofer a supla 900 Ugl. E chofer di brommer a pone trafico den peliger y cu permiso di fiscal e brommer a wordo confisca”.
Pabien na Motor Unit cu ta haci semper un bon trabou.