Prome Minister Evelyn Wever-Croes, na final di siman a duna informacion amplio di e ultimo desaroyonan cu Gobierno di Aruba ta ricibi tocante e situacion di Venezuela cu ta keda preocupante. Di parti di Gobierno, ta sigui tur e desaroyonan di cerca. Prome Minister Evelyn Wever-Croes ta sigura e comunidad di Aruba cu Gobierno di Aruba ta haci e maximo esfuerso pa tene nos comunidad informa pa asina tur hende por ta miho prepara.
“E situacion na nos pais bisiña Venezuela ta sigui tenso y confuso. Nos ta sigui e situacion di cerca pa hunto cu Marina Real, cu autoridadnan local y den coordinacion cu Corsou y Boneiro, ta miho prepara posibel”.
Pa loke ta e refineria na Aruba, Prome Minister a expresa di ta hopi preocupa. Diahuebs 14 di februari, ehecutivonan di Gobierno y di Citgo a reuni. Citgo a anuncia cu debi na ultimo sancionnan cu Merca a impone riba Venezuela, nan lo mester retira varios trahador riba termino corto.
“Mas cu claro nos no ta acepta esaki sin mas. Citgo tin un obligacion cu trahadornan y mester cumpli cu esey. Gobierno lo no coopera cu e retironan aki. Nos gobierno mesora a pone contacto cu ehecutivonan nobo di e refineria pa evita esaki mas tanto posibel. Lamentablemente nos no tin tur cos den nos man debi na e situacion tenso y confuso na Venezuela. Sinembargo nos lo sigui haci tur esfuerso posibel pa evita cu trahadornan local perde trabou y si nan perde trabou mes, a traves di instancia gubernamental lo intermedia pa nan haya trabou cu prioridad.
E refineria ta Strategico pa nos y pa Venezuela. Pero e circumstancianan ta complica memey di e desaroyonan geopolitico y interesnan di varios otro pais. Nos meta ta pa mantene continuacion di e refineria y henter nos gabinete ta envolvi den esaki. Nos a bise den pasado, y mi ta ripiti: hasta si tin solamente 1% di posibilidad pa habri e refineria, nos lo lucha pa logra habri e refineria. Ta bon pa bisa si cu locual nos ta bibando awor cu e Refineria no ta nada cu nos no tawata sa desde principio cu nos a drenta gobernacion.
Gobierno anterior lamentablemente en bes di negocia cu interes di pais Aruba den mente, a negocia cu otro interesnan den mente. A asocia nan mes cu hendenan dudoso cu ta envolve nan mes den practicanan dudoso. Aruba lo carga e fama di tabata habri pa hendenan manera Carvajal y Rincon. Con caro esaki a y lo costa nos, ainda nos mester haya sa.
Y Awe nos ta sinta cu e consecuencianan: un acuerdo cera cu tin un pilar di nos economia practicamente como rehen. Den cual no a tene cuenta cu interes di Aruba sino cu interes di algun individuo. Un refineria cu no a habri ainda.
Ta p’esey desde e principio di nos gobernacion, nos a duna e problematica aki hopi atencion.
Nos a reuni cu ehecutivonan di Citgo na varios ocasion desde januari aña pasa. Na februari Citgo a anuncia e slow down y cu lo a retira trahador. Nos a reuni cu e minister encarga cu energia sr. Quevedo na augustus.
Nos a bay Washington na mas di un ocacion pa atende e tema aki cu State Department y purba interveni cu OFAC pa cu e sancionnan. Sinembargo, sin resultado te ainda. Esaki no ta debi na nos, na Aruba, sino e ta debi na e partner inconfiable den e contract. E partner cu gobierno anterior a informa nos cu tabata confiabel y cu hasta Hulanda a aproba. Awor ta resulta cu esey no tabata berdad.
Sinembargo, ban enfoca riba e posibilidadnan nos dilanti. Tin un Cambio na horizonte cu cambio di dirigentenan di Citgo manera anuncia e siman aki, pasobra tin un chance cu autoridadnan mericano tin mas confiansa den nan y lo lanta e sancionnan. Nos a pone contactonan caba y Nos ta haciendo tur esfuerso pa logra cu e sancionnan por wordo lanta y asina nos por haya un partner serio pa rehabilita e refineria.
Manera cu mi a bisa, e Problemanan cu e refineria no a cuminsa awor y e situacion aki no ta nobo. Nos a pasa aden caba. Mescos cu e biahanan den pasado, nos no lo sinta man crusa. nos a lucha y surpasa e desafionan. Y Nos lo bolbe haci mescos. mi tin confiansa cu nos lo surpasa esaki atrobe
Mientras tanto pa loke ta e situacion na Venezuela mes, Corsou ta preparando pa fungi como ‘hub’ pa ayudo humanitario na Venezuela. Mi ta bolbe enfatisa cu ni Aruba ni Reino lo ta envolvi den accion military”.
Un biaha mas, Prome Minister ta haci un apelacion pa pueblo, pa nos tur keda trankil pa asina por tuma e miho desicionnan cu mester tuma. Laga nos sigui e desaroyonan via noticianan oficial di Gobierno. Den e fin di siman aki, tambe lo wordo saca hopi noticianan, hopi rumor y voicenotes for di Venezuela.
“Gobierno di Aruba no por haci nada pa e situacion interno di Venezuela. Loke si nos por haci ta uni den oracion y pidi pa e situacion di Venezuela pronto lo resolve na nos pais bisiña”.