E compromiso di Gabinete Wever-Croes ta pa trece alivio pa nos pueblo. E Reforma Fiscal ta un proyecto cu lo trece alivio pa nos pueblo pasobra e ta trece un sistema di belasting mas husto.
Gobierno awo ta evaluando e prome Fase di Reforma Fiscal cu a drenta na vigor cuminsamento di e aña aki. Fase 1 ta mas riba e tereno personal manera loonbelasting, inkomstenbelasting y grondbelasting; tambe ta trata e belastingnan cu ta causa comportacion negativo, manera alcohol y esunnan cu ta afecta salud, manera sigaria, y nos kier frena nan. Esakinan ta wordo yama “sin” taxes.
Gobierno ta sigui cu e reunionnan pa prepara pa introduci Fase 2 di Reforma Fiscal. Fase 2 ta e Impuesto Indirecto, cu ta e BBO. Diferente posibilidad ta wordo studia pa cu e direccion cu kier bay cu BBO entre otro e BTW (manera IMF ta pronone) of Omzetbelasting (manera Corsou ta propone). Tambe e demas reforma den inkomstenbelasting lo wordo introduci. Awo ta papia solamente di tarifa. Pero tambe lo reforma y haci e formulario di inkomstenbelasing mas senciyo. Prome Minister ta duna di conoce cu esaki no ta un decision cu Gobierno por a tuma e aña aki pero si den e siguiente lunanan nos dilanti.
Fase 3 ta e Impuesto pa comerciantenan. Lo studia posibilidad di cambio riba e Impuestonan cu comerciantenan mester paga esta Winstbelasting y Dividend Belasting. Pa trece un balans bek den nos sistema di Impuesto, esaki mester afecta tur hende. Comerciantenan tambe ta indica cu awo aki tin un sistema di Impuesto hopi complica y cu ta costa hopi.
Fase 4 ta e impuestonan cu ta trata di turismo. Nos bishitantenan di afo ta paga varios impuesto, Roomtax, Car rental tax, Time Share, All inclusive Tax, Casino Drop Tax. Gobierno riba e tema aki ainda no a sinta cu AHATA pero tambe ta riba agenda pa pronto sinta cu tur esnan concerni riba e tema aki.
“Gobierno ta bay paso pa paso cu e sistema nobo aki. E Reforma Fiscal ta parti den 4 fase. Si cada fase tuma 6 luna pa worde desaroya y implementa, den dos aña e ora Aruba por tin un sistema di Impuesto mas husto y senciyo. E prome paso ya a drenta na vigor y ta trece alivio pa Aruba. Hunto cada ciudadano ta coopera pa hiba nos pais den bienestar y progreso. Esaki ta nos compromiso”, Prome Minister Evelyn Wever-Croes a duna di conoce.