No solamente gabinete Wever Croes nunca a cumpli cu promesanan haci na pueblo pero entre nan mes no tin ningun tipo di coordinacion riba e forma con e pais aki tin cu wordo goberna.
Miembro di fraccion di AVP, Michael Lampe a mustra cu gabinete Wevber Croes ta birando un gobierno di excusas, di busca argumentonan fofo pa sostene un plan di gobernacion cu ningun hende conoce ainda.
“Na momento cu nos scucha e siman aki con Minister di Finansa, Xiomara Ruiz Maduro a trata di hustifica e incapacidad di su gobierno pa duna claridad riba preguntanan haci di parti di CFT, ta ta confirma e falta di vision y e incapacidad total di e gobierno actual.
Minister Xiomara Ruiz Maduro no a busta niun tiki cu CFT a dirigi e di tres carta na e minister pa duna algun claridad riba diferente punto cu e comision financiero tin duda riba nan.
Entre otro por a scucha e minister di finansa mustra cu CFT mester compronde e crisis social cu tin na Aruba y caminda gobierno ta pone e muchanan victima di abuso sexual y maltrata prome, tambe e grupo di muhenan kendenan tabata victima di maltrato fisico y gabinete Wever Croes ta pone atencion prome na e hendenan aki como parti di e crisisplan cu e tin.
Tin otro puntonan tambe cu CFT kier claridad ariba pero cu ta mustra cu minister di finansa no tin splicacion pa duna riba e asuntonan aki y ta buscando un forma pa bira rond di e observacionan aki di CFT pa cu e presupuesto 2019.
Minister Ruiz Maduro claramente no ta compronde e posicion di CFT y sin duda no ta mucho contento cu e posicion cu e comision di supervision a tuma relaciona cu su presupuesto 2019 y ta mustra cu ta tin un crisis y cu su gobierno ta atendiendo cu e crisis aki y pa tal motibo e no por compronde e preguntanan di CFT relaciona cu e fondo cu tin staciona pa mas c’un aña caba di miyones di florin sin cu gobierno ta splica kico e ta bay haci cu e placa aki.
Minister di Finansa tin problema cu CFT cu ta dirigi mesun carta cu mesun preguntanan pa di tres ocasion caba y awor a duna gabinete Wever Croes dos siman di tempo pa duna claridad riba e asuntonan aki, cu no a cay na agrado di minister Ruiz Maduro.
Sinembargo aki ta bon pa nos menciona dia 23 di october di 2018, Prome Minister Evelyne Wever Croes a tene un conferencia di prensa den cual el a presenta ‘logronan positivo di gabinete Wever Croes,’ den cual e tin elogio di CFT y cu e comision aki tin confiansa total den su gobierno.
Premier Wever Croes a menciona entre otro cu ‘CAFT ta elogia su gobierno pa mustra seriedad den atende cu finansa publico di pais Aruba y cu a duna recomendacionnan riba diferente tereno.’
Sinembargo nos ta duda cu CFT ta dirigi un carta cu mesun preguntanan na tres ocasion pa gabinete Wever Croes, cu no ta dunando splicacion riba entre otro aumento di gasto di personal, ningun claridad riba e fondo pa e crisisplan y con gobierno ta bay baha su gasto di personal.
Pues ta mesun CFT cu Prome Minister a elogia recientemente awor ta mustra mesun gobierno cu nan mester mustra mas claridad riba e maneho financiero, loke ta ilustra un biaha mas un falta di responsabilidad cu mester tin na momento di dirigi e pais aki,” Parlamentario Michael Lampe a declara.
‘