Un reunion caminda a resalta diferente reto cu e directiva di fundacion Ambiente Feliz y e trahadornan diariamente tin cu atende cu ne, pero unda mas ainda a sobresali e animo, dedicacion, entusiasmo y amor cu cual e trahadornan ta traha cu ne.
Parlamentario Tromp-Lee ta comenta cu cada biaha e bishita un instancia cu ta duna cuido na un di e gruponan mas vulnerabel den nos comunidad, semper e ta keda asombra con cu minimo na fondo, recurso humano y infrastructura limita, e trahadornan ta haci nan maximo esfuerso pa ofrece un cuido debido na nan clientenan. Durante e reunion mas cu claro nan ta vocifera na mes momento cu mester duna oido na nan necesidadnan como organisacion y mas cu tur cos nan ta fungi debidamente como e bos pa nan clientenan cu hopi biaha no por haci esaki pa nan mes.
E fundacion tin diferente proyecto cu a corto plazo mester keda realisa manera drecha nan dak di edificio, upgrade nan cushina y percura pa mas seguridad pa nan clientenan. Pero e peso di mas grandi cu nan tin diariamente ta creatividad cu nan mester aplica pa por percura pa un calidad di bida aceptabel pa nan clientenan. Un ehempel cu por ilustra esaki ta e echo cu nan mester percura pa un dieta balansa y saludabel diariamente (3 cuminda pa dia) pa 20 cliente cu un budget di solamente Awg. 2.500,- pa luna.
P’esey mes nan ta indica cu e subsidio cu nan ta ricibi durante añanan a keda mescos of asta a yega di baha, mientras nan gastonan y necesidad pa haci inversion of amplia e cuerpo di trahador ta keda subi. Otro punto di preocupacion ta cu nan ta ripara cu e sponsornan cu usualmente nan sa ricibi tambe pa aña ta birando menos. Cual ta haci hopi dificil pa nan por genera e fondonan necesario pa por realisa e proyectonan anteriormente menciona.
Parlamentario Tromp-Lee ta remarca cu nan peticion specifico na e comision fiho di Parlamento ta pa durante tratamento di presupuesto percura pa otorga e fondonan necesario na nan Fundacion, mediante e subsidio anual, conforme nan ‘wenselijkheidsbegroting’. Esey ta e unico manera pa nan por brinda e cuido di calidad necesario y realisa e inversion grandi necesario pa nan por cumpli cu e ley di cuido y calidad. Na mes momento ta crea e espacio financiero pa porfin por duna e atencion necesario y urgente na diferente asunto di personal cu pa añanan no a keda atendi cu nan. Un peticion na su lugar y cu sigur e parlamentarionan presente tin tur oido pe.
Na mes momento como Parlamentario, sra. Tromp-Lee ta indica cu tin otro manera tambe cu por crea alivio y na mes momento por realisa mas espacio den e cashflow di e organisacion, esta door di of mediante intervencion di Gobierno yuda baha e gastonan di e instancia. Por pensa por ehempel di exonera e instancia di pago di erfpachtcanon, introduci un tarifa social pa loke ta trata prijs di utilidad y servicio di Setar, prijs reduci di Serlimar etc.