ORANJESTAD – Dia 4 di februari Minister di Finansa, Asuntonan Economico y Cultura a ricibi Frank Dijkhoff kende a cumpli 35 aña den servicio di Gobierno di Aruba. Den nomber di Gobierno di Aruba, e mandatario a gradici Sr. Dijkhoff pa su lealtad como funcionario publico di pais Aruba y a entrege su Landsbesluit y gratificacion corespondiente hunto cu un regalito pa conmemora e hubileo importante aki. Ademas su hefe directo Sr. Marc Simon den nomber di coleganan di Cuerpo di Aduana a entrega Sr. Frank Dijkhoff un bunita reconocimento.
Sr. Dijkhoff tabata hopi contento y a expresa cu e ta desea di por tin oportunidad pa por traha 35 aña mas, su pasion pa trabao ta grandi y loke mas e ta aprecia ta e trato cu ela bin ta ricibi di su coleganan. Na e ocasion special aki tambe tabata presente Director di Departamento di Aduana Sr. Ricky Croes.