Montaña/Kudawecha: Diaranson den oranan di marduga polis ta haya informacion di un auto cu lo a hit and run 3 biaha contra e mesun auto. Mesora ta manda un patruya na e crusada di Montaña pa bay Sero Janchi.
Na yegada e polisnan ta bin compronde cu un Toyota Camry Shinishi a dal tres biaha contra e mesun Nissan Silvia y di e mesun forma, cada biaha ela reverse dal e Nissan Silvia. E chauffeur a splica polis cu mas trempan,nan ta tres amigo y nan a sali bay dal un trip, cada un cu nan auto, despues di a trip nan a bay para canto di caminda cerca di e crusada di Montaña pa bay Sero Janchi.
E Toyota Camry tabata para memey di e dos autonan, e chauffeur di e Camry a reverse pa bay sali, pero no a pone bon tino riba e distancia di unda e Silvia tabata staciona. E chauffeur di e Silvia a mira cu e chauffeur di e Camry no tabata poniendo tino, mesora ela cuminsa dimp bright y pita e auto, asina mes e chauffeur di e Camry a bay full speed reverse y a dal contra e silvia. E chauffeur di e Camry no a para y a sigui core bay direccion di Kudawecha.
E chauffeur di e Silvia mesora a sigui e Camry y na Kudawecha e Camry a para, e Chauffeur di e Silvia a para net patras di e Camry, pa bay reclame, e chauffeur di e Camry a bolbe manda e auto den reverse y a bolbe dale contra e Nissan Silvia. Un biaha mas e no a para y a sigui core bay bek direccion di Montaña.
Na yegada na Montaña e Nissan Silvia a bolbe para patras di E Camry pero e biaha aki a par’e di un forma cu e chauffeur di e Camry no por sali bay. Pero un biaha mas mane nada no a pasa ela bolbe pone su TOyota Camry den reverse y a bolbe dal contra e Nissan Silva pero e biaha aki si e no por a sigui core bay.
Polis a ripara cu e chofer di e Toyota Camry tabata basta bou influencia, nan a detene y a transporte pa Warda di Shaba caminda elo a haya un cuarto gratis pa e descansa.
Un burico sigur no ta dal su pata dos biaha na e mesun piedra, pero e chauffeur di e Camry Si a dal su auto no un, ni dos pero tres biaha na e mesun Nissan Silvia.
No tabata tin niun persona herida pero si basta daño material, esaki si tabata un trip di tres amigo cu a caba cu gastonan grandi.