ORANJESTAD, Aruba: Anualmente riba dia 1 di December, organisacionan rond di mundo ta pone atencion riba e malesa di AIDS pa di e manera aki eleva e conocemento y prevencion riba e malesa aki. E aña aki UNAIDS ta celebrando 30 aniversario desde cu a conmemora e dia aki na aña 1988.
Tur aña di nobo ta enfoca riba un tema y e aña aki e tema ta “Sa bo status”. Cu e tema aki organisacionan kier encurasha tur persona pa busca y sa nan status di e malesa AIDS.
For di 1988 te cu awe, progresonan significativo ta sigui wordo haci riba e topico y malesa di AIDS. Internationalmente 3 di 4 persona cu AIDS sa nan status y di e manera aki por tin acceso na tratamento di calidad y servicio di prevencion. Segun UNAIDS e trabou no a caba ainda.
Desafortunadamente na otro paisnan rond mundo tin hopi barera pa hende por haci test di HIV y hopi biaha e miedo pa sa e resultado of e discriminacion ta conduci cu un persona ta prefera di no sa su status te ora cu e sintomanan cuminsa aparece.
Na Aruba pa haci un test di HIV un persona por acudi na su dokter di cas, na un laboratorio of na seccion di Malesanan Contagioso di Departamento di Salud Publico. Test pa HIV ta esencial pa por garantisa tratamento optimal pa un persona cu HIV pa e por biba un bida mas saludabel y mas productivo posibel. Door di sa bo status bo por proteha bo salud y di esnan cu mas bo ta stima.
Departamento di Salud Publico riba dia Mundial di AIDS tambe ta uni su mes y ta encurasha comunidad pa “sa bo status”. Den caso di un persona cu HIV, mas trempan e sa cu e tin e malesa mas lihe e por cuminsa cu su tratamento y biba un bida mas conciente y saludabel.