Flightnetwork.com a escohe Malmok como e di 6 mihor beach den Caribe y America Central, tambe Malmok ta e di 24 top beach na mundo.
Flight Network ta e agencia di biahe mas grandi na Canada, e agencia aki ta busca e mihor dealnan pa nan clientenan, 24 ora pa dia y 7 dia pa siman. Nan tin partnership cu mayoria di aerolineanan grandi y ta ofrece paketenan di biahe pa tur parti di mundo.
Algun siman pasa Flight Network a haci un survey pa asina saca e mihor beachnan na mundo y den diferente categoria, pa asina facilita nan clientenan ora nan kier bay cu vacacion y kier sa mas di un destinacion of no sa unda pa bay pasa nan vacacion.
Flightnetwork.com por medio di e survey a escohe e mihor 50 beachnan mundialmente, tambe di cada continente a saca e mihor 50 beachnan. Nan a categoriza e beachnan, manera e 50 mihor city beaches of 50 mas remote of untouch beaches.
Malmok a wordo nombra dos biaha, den e mihor beachnan di mundo y tambe den e mihor beachnan di America Central y Caribe.
Flight Network a acerca mas di 1200 persona cu ta traha pa medionan di comunicacion y of tin un of otro expertisio den e ramo di turismo y biahe. Esnan cu a participa na e survey aki, tabata varios redactor, periodistanan, touroperatorsnan y agentenan di biahe di tur parti di mundo.
Arubanative.com tambe a wordo acerca pa Flightnetwork.com pa participa na e survey aki, nos mesora a duna nos cooperacion y un poco di nos tempo pa participa na e survey aki. Maske e survey tabata basta largo y e preguntanan tur no tabata facil pa contesta, pero asina mes nos a cumpli.
E motibo principal pakiko Arubanative.com mesora a acepta di participa; ta pa so Aruba ta depende di turismo y Flightnetwork.com ta bende Aruba como un di nan destinacionnan. Como un medio di comunicacion local nos sigur mester aporta na esnan cu ta aporta na nos economia door di trece turista pa nos isla.
Nomber di tur persona y compania cu a participa na e survey di Flightnetwork.com a wordo menciona riba nan website como muestra di aprecio pa e cooperacion cu nan a ricibi.
Esaki ta e link pa haya mas informacion y mira e mihor beachnan segun e survey di Flightnetwork.com
https://www.flightnetwork.com/worlds-best-beaches/