Minister di Transporte, sr. Chris Romero, a tene su prome reunion informativo cu taxistanan, y pa cuminsa a escohe e grupo di esnan cu ta 70+ di edad. A informa e taxistanan di e maneho existente y di nan banda a scucha sugerencia pa cu cambionan cu nan lo desea di mira den e maneho di parti di Gobierno.
E titular di Transporte a informa e grupo di taxista cu e maneho pa cu traspaso di permiso di taxi no a cambia, pero e intencion ta pa bin cu un opcion aserca. “Nos a sugeri pa brinda e taxistanan un oportunidad di por haya algo ora nan dicidi di no brinda nan servicio mas, y cu no tin e posibilidad pa pasa nan permiso pa nan casa of yiu cu ta biba den cas”, Minister Romero a comenta.
E opcion cu kier agrega na e maneho existente ta den proceso serca e expertonan di ley, pero e intencion ta pa duna e taxistanan cu no por sigui eherce nan trabou mas, e oportunidad di tin un ‘hulpchauffeur’ pa 2 aña. “Na momento cu un taxista dicidi cu e no lo por sigui eherce su trabou, nos kier duna nan e oportunidad di haci uzo di un ‘hulpchauffeur’. Conhuntamente cu nos hurista, nos ta trahando riba e aspecto legal di e opcion aki pa brinda e taxistanan un siguransa economico. E no lo ta un pension, pero ta purbando di cuminsa na algo mas husto y na beneficio di e taxista. Mas cu claro nos lo sigui bin cu incentivonan y proyectonan pa por duna un trankilidad financiero na e taxistanan di mas edad”, Minister Chris Romero a enfatisa.
“Cu ayudo di e propio taxistanan, nos kier yega na un maneho gubernamental mas efectivo y beneficioso pa tur partido envolvi. Nos kier y mester di e aporte di nos taxistanan pa asina nos, como Gobierno, por yega na un maneho mas efectivo y na beneficio di un y tur. Esaki ta e meta tras di e reunionan aki, pasobra ami ta kere den dialogo y trabou den conhunto pa asina logra yega na acuerdonan positivo pa nos pais”, e mandatario a finalisa.