Dia 22 di November, awo, e persona acusa pa caso di abuso contra e dos yiu muher di Sr. Danies, esta Juan Damaseno Tromp, lo tin cu presenta na Corte pa 10:15 di mainta. Sr. Danies ta confia cu husticia no lo laga liber un abusador cu a ripiti e conducta dañino aki cu diferente miembro di e famia di e ex-compañera di Reginald Danies. E fiscal cu tabata trata e caso aki a bay Hulanda bek y un fiscal diferente lo ta encarga.
Mirando cu e sistema completo pa denuncia un pedofiel, investigacion y tratamento di e caso ta asina complica y largo; y despues di a bati tur porta na Aruba sin por a haya un contesta of ayudo, Sr. Danies -den su desesperacion como tata- a busca otro manera pa hala atencion di e autoridadnan pa su caso. E tata frustra aki ta e autor di e graffitinan cu tin tur caminda, na unda e ta manifesta cu Aruba ta Pro Pedofiel. Ni asina, e mayor angustia aki a haya reaccion di e autoridadnan, ni mucho menos husticia pa caso di su yiunan.
Segun Sr. Danies, nos sistema tin yen di buraco caminda e pedofiel por sali cu su kier. E ta sugeri pa e ley completo wordo restructura.
E dos yiu muher di Reginald Danies ta actualmente bou tratamento. Nan tin dos diferente psycholoog, uno cu e mes ta paga y e otro como servicio di gobierno. Tur dos rapport ta duna e mesun informacion, caminda ta confirma cu e dos mucha aki ta papia berdad. Dos experto den psicologia ta conclui cu no tin gañamento den nan version.
Sr. Danies ta hayando yudansa actualmente for di un instancia di gobierno, pero caminda tin cierto buraco e instancia aki mes ta sinti cu su man ta mara y mester bin cambio.
Reginald Danies kier haci un yamado na henter nos comunidad pa no ta indiferente den e tipo di maltrato spantoso aki contra mucha.
Sin importa kico e mes como persona a pasa aden (su pasado, su apariencia, etc), su yiunan no mester a wordo abusa sexualmente pa Juan Damaseno Tromp y ta merece haya husticia pa e daño serio causa na nan. Derecho di mucha no ta conta solamente pa educacion y salud, pero tambe muchanan tin derecho pa biba den un ambiente cu ta sigur pa nan desaroyo.
Pa termina, Reginald Danies kier exigi un castigo contundente pa e verdugo di su yiunan. Un persona cu comportacion dañino asina ta perhudicial pa circulonan familiar y social, y ta constitui un peliger pa nos comunidad completo. E yamado tambe ta wordo haci na nos autoridadnan pa bin cu ley riguroso cu ta proteha nos muchanan na ordo, E situacionan aki no mester tuma lugar na Aruba y si algo asina pasa toch, e abusador mester sa cu tur peso di ley lo cay ariba dje.
“Corte: por favor tene cuenta cu mucha, con su bida ta wordo mancha pa semper y con su inocencia ta wordo horta. Pueblo: no sea indiferente, loke a pasa cu mi yiunan, por pasa cu bo yiunan tambe. Gobierno: cambia e sistema y ley completo. No laga mas bida di mucha wordo desgracia!” Sr, Danies a caba ta bisa.
Esnan cu lo kier compaña Sr. Danies na e audiencia na Corte por haci esaki dia 22 di November awo pa 10:15am