Ultimamente hopi informacion incorecto ta circulando encuanto e maneho cu Minister Romero lo institui pa nos taxistanan. Pa e motibo aki e titular di e cartera di Transporte a dicidi cu, pa por comunica di un manera efectivo cu tur 450 taxista cu tin na Aruba, lo cuminsa cu un serie di reunion caminda lo dividi e taxistanan den grupo. Pa ta specifico, a reparti e taxistanan den grupo segun nan edad, y como tal a dicidi di cuminsa na esnan cu ta riba 70 aña. “Nos sa cu tin 450 taxista y no lo ta eficiente pa reuni cu nan tur na mes momento. Pa e motibo aki nos a escohe pa cuminsa na reuni cu e grupo di taxista 70+, dunando nan asina e respet y honor mereci pa nan añanan di servicio brinda den beneficio di nos pais”, Minister Romero a comenta.
Meta di e reunionnan aki ta pa Minister Romero intercambia informacion cu e taxistanan, cu e finalidad di mehora e servicio cu nan ta brinda na nos turistanan. “Ta asina cu mi a manda un invitacion na e grupo di taxista di edad mas halto, pa asina personalmente mi por scucha nan preocupacionnan y asina hunto nos yega na palabracionnan y acuerdonan cu lo beneficia tur partido envolvi”, Minister Chris Romero a sigui bisa.
E mandatario encarga cu e Ministerio di Transporte, ta di pensamento cu “ora nos bishitantenan yega Aruba, mayoria biaha ta e taxista tin e responsabilidad di laga un bon prome impresion serca e turista”. Cu e pensamento aki como prioridad, y cu e principio di dialogo cu Minister Chris Romero semper a mantene, a dicidi di tene un dialogo na nivel mas personal cu nos taxistanan, pa asina hunto purba trece solucionnan realistico y duradero na beneficio di un y tur.
Minister Romero lo sigui su reunionnan cu e taxistanan y pronto e siguiente grupo lo ricibi tambe un invitacion personal pa asisti na e proximo reunion cu e mandatario. “E siguiente grupo cu nos lo bay reuni cun’e ta esnan di menos cu 70 aña, y despues nos lo continua cu esnan di edadnan mas abou, partiendo nan den grupo tambe”, e titular di e cartera di Transporte a culmina.