ORANJESTAD – IDEA (Iniciativa pa Desaroyo pa Empresa Arubano) a organisa e workshop “Time for Taxes”. E oradornan di Departamento di Impuesto (DIMP), Sr. Arjan Kisjes, Sra. Valeska Milton-Genaro y Sra. Johrainne Giron-Lacle, a presenta e siguiente topiconan:
• Inkostenbelasting
• Winstbelasting
• BBO/BAVP/BAZV
• Loonbelasting y primanan social
• Verzamelloonstaat
• Verzamelstaat opgaaf derden
Durante di e presentacion, Sra. Luenne Gomez-Pieters, directora di DIMP, y Sra. Meverly Romano, vocero di DIMP, tambe tawata presente pa contesta cierto preguntanan y tambe pa informa e participantenan di cierto cambio cu lo bay tuma luga otro aña. Na final di e presentacion, e participantenan a haya oportunidad pa traha riba casus caminda nan por a practica e teoria cu nan a ricibi durante e presentacion. Un workshop sigur hopi interactivo y un tremendo presentacion di parti di e team di Departamento di Impuesto.
Un total di 40 persona a participa den e workshop menciona. IDEA ta sumamente contento cu e acogida di e workshop y e bon comentarionan ricibi di su participantenan. Semper belasting ta keda un topico hopi importante pa nos comerciantenan y pa e motivo ey nos lo bay ripiti e workshop aki tur aña pa nos comerciantenan. Tambe IDEA kier remarka cu nan workshopnan ta gratis y ta dedica na un y tur cu kier cuminsa un negoshi of tin un negoshi existente y kier educa nan mes riba diferente topico comercial.
Un danki na tur e participantenan y un danki special na e presentadornan di Departamento di Impuesto cu a comparti nan experticio cu tur esnan presente. IDEA ta gradici tur e coleganan di DEZHI cu a yuda na un of otro manera. Keda pendiente pa mas workshop den luna di november venidero cu lo IDEA lo organisa. Keda pendiente pa mas di nos actividadnan y sigui nos riba Facebook page @Idea-Aruba pa mas workshop den futuro.