Home Sports Seleccion Nacional U-20 preparando a competencia di CONCACAF

Seleccion Nacional U-20 preparando a competencia di CONCACAF

 

 

ORANJESTAD, Aruba – 26 di October 2018: E seleccion U20 di Arubaanse Voetbal Bond (AVB) ta den preparacion pa bay hunga den e competencia di CONCACAF Under 20 Championship 2018 na Florida. E seleccion a cuminsa prepara na comienso di September y ta bayendo bon. E seleccion tin casi dos luna den un training intenso, asina Alex Sierra, Manager di seleccion U20 di AVB, a indica.

 

E seleccion a topa otro riba pa di dos biaha riba un diadomingo, unda cu nan ta desayuna hunto. E hungadonan a ricibi charla di nutricion, con pa recupera y cuida curpa. Durante e di dos encuentro nan a ricibi masashi pa yuda nan spiernan.

 

Nan tin 1 siman y mey mas di preparacion, pasobra dia 31 di October nan lo biaha pa Florida. E entusiasmo di e hungadonan ta hopi halto. A cuminsa cu un cantidad di 40 hungado y poco poco a baha esaki, te cu a yega na e cantidad di 22 hungado cu algun reserva. E reservanan tambe ta dunando 100%, di cual henter team ta dunando e miho di nan.

 

E ekipo mes ta consisti di 22 hungado y 7 staff, di cual ta obligatorio cu nan mester biaha cu un Dokter como parti di e seleccion. E seleccion di Aruba a cay den un poule interesante, segun Alex Sierra. Aruba lo enfrenta Mexico, Jamaica, Grenada, Saint Martin y Nicaragua den poule B di 6 team.