Den cuadro di Siman di Enseñansa, diahuebs tabatin un presentacion di EPI ‘Education & The Future Of Work’, unda a dialoga riba e topico aki y Parlamentario Sue-Ann Ras (MEP) tambe tabata presente. E orador a presenta na comienso, cu nos ta den e di Cuater Revolucion Industrial, cu a inicia na 2010. E tema aki di educacion y futuro laboral ta refleha y encera hopi cambio den futuro y den nos sistema di enseñansa.
CREATIVIDAD
Nos mester bira hopi mas consciente di kico tin den futuro y con nos ta preparando nos mucha- y hobennan pa e era digital y tecnologico. “Cada mucha ta cuminsa su biahe di bida cu un potencial increibel: un mentalidad creativo, cu ta acerc’e na nos mundo cu curiosidad, cu pregunta y cu e deseo di siña tocante mundo y di nan mes, a traves di wega. Sinembargo, ora e mucha chikito drenta nos scolnan tradicional, ta oprimi of incluso elimina e creatividad aki, p’e practicanan educativo convencional,” Ras a indica. Hopi di nos sistema educativo actual ta obsoleto encuanto e habilidadnan necesario pa funciona den e mercadonan laboral actual. Nos sistema te ainda ta concentra y enfoca principalmente pa desaroya e habilidadnan cognitivo di e muchanan den e materianan tradicional, na luga di fomenta e habilidadnan manera resolucion di problema, creatividad of colaboracion. Esaki mester ta motibo di preocupacion, ora cu analisa e habilidadnan rekeri den e Cuater Revolucion Industrial: resolucion di problema compleho, e pensamento critico y e creatividad, cu ta e 3 habilidadnan mas importante cu un mucha mester pa prospera. “Ta preocupante cu e habilidadnan aki hopi biaha, no ta destaca diariamente cerca nos muchanan, unda e norma ta sigui ta e enfoke di enseñansa di bida completo!”, Ras a enfatisa.
FUTURO LABORAL
Realidad ta cu alrededor di 70% di profesion pa 2030 no ta ni existi ainda. Esaki ta un indicacion cu nos tur mester cuminsa papia di e peligernan di automatisacion, inteligencia artificial y di con e avancenan tecnologico por elimina un porcentahe importante di e empleonan, cu nos conoce den actualidad. P’esey nos mester haci e pregunta cardinal: “Con nos por prepara nos pais pa un futuro incierto di profundo cambio den mercado laboral?” Loke nos ta sigur di dje pa Aruba ta sector hotelero y sector di cuido. E Cuarto Revolucion Industrial, denomina como un tsunami tecnologico, tin e potencial di contribui na fin di e trabounan cu nos conoce y ehempel tin hopi, specialmente si wak den exterior. E habilidadnan existente den forsa laboral tambe ta influi den e incentivonan pa automatiza y potencia pa crea cupo di trabou nobo. “Mi no ta referi solamente na e habilidadnan digital, sino tambe na e habilidadnan socioemocional, esunnan cu e robotnan no por alcansa, manera empatia, comunicacion, persuasion of negociacion y analitico, manera e capacidad pa resolve problema of sa con pa siña. SETAR como un compania nacional, cu ta promove y encurasha su empleadonan pa ta ‘’lifelong learner’ tambe a indica, cu nan ta enfoca riba e habilidadnan social y emocional aki y nan ta traha hopi cu nos alumnonan di EPI, UA y HAVO. SETAR a indica cu nan mester hopi desaroyado di programa y esaki sigur ta conta pa hopi compania mas, unda cu un estudio di ICT ta di sumo importancia pa nos implementa den nos sistema di educacion riba nivel bachelor of master,” Ras a finalisa bisando.